Журы Прэміі імя Міхала Анемпадыстава абвясціла шортлістараў бягучай эдыцыі. У фінал прэміі за найлепшую кніжную вокладку за 2025 год трапіла восем кніг. Фіналісты былі адабраны з 24 прац, што ўвайшлі ў доўгі спіс конкурсу, і прадстаўляюць зрэз сучаснага беларускага кніжнага дызайну. “Сёння беларускае мастацтва патрабуе не толькі таленту, але і смеласці, таму імёны некаторых аўтараў зашыфраваны з меркаванняў бяспекі”, – адзначаюць арганізатары.
Хто ж у спісе?
- Аўтар В – вокладка кнігі «W» (зашыфраваны ўдзел)
- Дзмітрый Дзмітрыеў, Андрэй Фядорчанка – вокладка кнігі «Codex. Imago. Index» Дзмітрыя Дзмітрыева
3. Аўтар К – вокладка кнігі «К» (зашыфраваны ўдзел)
- Алена Нядзельская – вокладка кнігі «Я – тое мяса, якое прыгатаваў Зміцер» Змітра Вішнёва
- Аляксандр Пажытак, Ігар Юхневіч – вокладка кнігі «Дзённік 2021–2022» ананімнай аўтаркі
- Ліна Хесэ, Ігар Юхневіч – вокладка кнігі «Беспрацоўнае дрэва» Светы Бень, Ліны Хесэ
- Сяргей Шабохін – вокладка кнігі «Body in Progress; Целам сваім…» Ганны Комар
- Таццяна Шустава – вокладка кніг «Творы» (тамы 1, 2) Хорхе Луіса Борхеса
Сёлета конкурс ацэньвае журы ў складзе: беларуская мастачка і ілюстратарка Святлана Дземідовіч, беларускі дызайнер і культурны дзеяч Анатоль Лазар, крэатыўная дырэктарка і спецыялістка ў сферы візуальных камунікацый Надзея Зелянкова (таксама ў журы ўваходзяць і эксперты, якія пажадалі застацца ананімнымі).
Заснаваная ў 2019 годзе, прэмія носіць імя выдатнага беларускага мастака, дызайнера, паэта і культуролага Міхала Анемпадыстава, які значна паўплываў на візуальную культуру Беларусі. Прэмія працягвае ўшаноўваць яго творчую спадчыну, адзначаючы аўтараў, якія праз дызайн кніжнай вокладкі ствараюць новыя візуальныя гісторыі.
Арганізатары ўзнагароды — Беларускі ПЭН і фонд «Open Culture» пры падтрымцы партнёраў: ТАА «H&L» і кампаніі «Laut».
Сярод пераможцаў мінулых гадоў: Ігар Юхневіч і Маша Мароз за вокладку кнігі Вольгі Аполькі «Мое баба – діректор морга» (2025), Святлана Дземідовіч і Лукаш Левандоўскі за вокладку да паэтычнай кнігі Насты Кудасавай «Побач» (2024).
Падпісвайцеся на культурныя навіны Reform.news у Telegram
