Супольнасць чыгуначнікаў Беларусі распавяла падрабязнасці будаўніцтва ваеннага палігона Якімаўка ў Рэчыцкім раёне.
Палігон будуецца ў лясным масіве Рэчыцкага раёна каля станцыі Якімаўка — прамежкавай станцыі на ўчастку Калінкавічы – Гомель. Ад Якімаўкі будуецца новы шлях даўжынёй каля 1,24 км да пагрузачна-разгрузачнага комплексу ўнутры палігона.
Паводле інфармацыі СЧБ, на новым шляху можна будзе размясціць да 60 вагонаў. Гэта дазволіць вызваліць станцыйныя шляхі Якімаўкі і скараціць прамежкавыя манеўры на інфраструктуры агульнага карыстання. Інфраструктура, якая будуецца, дазваляе выкарыстоўваць шлях на палігон для дастаўкі асабовага складу, узбраення і ваеннай тэхнікі, паліва, боепрыпасаў, інжынернай маёмасці і іншых грузаў.
«Пасля ўводу чыгуначнай часткі палігон стане пунктам прыёму воінскіх эшалонаў на ўкраінскім напрамку. Шлях на 60 вагонаў, уласны пагрузачна-разгрузачны фронт, сувязь і цэнтралізаваны маршрут са станцыі прыкметна пашыраць магчымасці па перакідцы, забеспячэнні і ратацыі падраздзяленняў», — заяўляе СЧБ.
Спадарожнікавыя здымкі ад 18 ліпеня 2026 года паказваюць, што работы па будаўніцтве шляху ўжо пачаліся.
