66-гадовы грамадзянін Беларусі, які працуе таксістам ва Уроцлаве, падвергся нападу на працоўным месцы. 23-гадовы агрэсар затрыманы, паведамілі ва ўпраўленні паліцыі Уроцлава.
«Паводле слоў пацярпелага, 23-гадовы мужчына, пачуўшы яго ўсходні акцэнт, пачаў выкарыстоўваць абразлівыя выразы, якія тычыліся яго нацыянальнасці. Аднак нападнік на гэтым не спыніўся і ўдарыў кіроўцу па галаве шкляной бутэлькай», – гаворыцца ў паведамленні паліцыі.
Паліцыя хутка ўстанавіла асобу нападніка і затрымала яго. Гэтаму дапамог відэазапіс, зроблены сведкам, ён жа аказаў дапамогу таксісту.
Затрыманаму мужчыну прад’яўлена абвінавачанне ў нападзе па матывах нацыянальнай прыналежнасці. Паводле рашэння пракурора падазраваны будзе знаходзіцца пад наглядам паліцыі.
«Паліцыя нагадвае грамадзянам, што ніякія нацыянальныя, культурныя або моўныя адрозненні не павінны быць прычынай агрэсіі або прыніжэння. Любыя падобныя паводзіны ўспрымаюцца вельмі сур’ёзна і цягнуць за сабой крымінальны пераслед, а праваахоўныя органы абвясцілі аб рашучых мерах рэагавання», – дадалі ў паліцыі.
