Аляксандр Лукашэнка змяніў міністра працы і сацыяльнай абароны падчас сённяшняга кадравага чацвярга.
Гэтую пасаду пакідае Наталля Паўлючэнка. Яна займала яе з чэрвеня 2024 года.
На яе месца прыходзіць Андрэй Лабовіч. Да прызначэння міністрам ён займаў пасаду намесніка старшыні Камітэта дзяржаўнага кантролю, на якую быў прызначаны ў 2021 годзе.
“Нашы прыярытэты арыентаваныя на тое, што мы ў чалавечы капітал павінны ўкладвацца. А праца і сацыяльная абарона насельніцтва — твой прыярытэт. І трэба, каб міністэрства было бачна.
Я не хачу папракаць нашых жанчын, якія працавалі міністрамі дагэтуль, але яны неяк сціпла выглядалі. Можа, гэта і добра? Трэба, каб міністэрства гэта гучала. З выгляду, напэўна, гэта вам падыходзіць. Трэба, каб быў вынік”, — сказаў Лукашэнка новаму міністру.
Сярод іншых сённяшніх прызначэнняў — новы старшыня Віцебскага аблвыканкама і новыя кіраўнікі ў вертыкалі Магілёўшчыны.
