Былы прэм’ер-міністр Польшчы Матэвуш Маравецкі створыць новую палітычную партыю. Раней члены яго аб’яднання «Развіццё+» былі выключаныя з партыі «Права і справядлівасць».
У інтэрв’ю YouTube-каналу «Rymanowski Live» былы прэм’ер-міністр заявіў, што партыя будзе сфарміраваная не пазней за 15 кастрычніка. У кастрычніку плануецца правесці першы з’езд новай палітычнай сілы.
Дата выбраная невыпадкова. 15 кастрычніка 2023 года адбыліся папярэднія выбары ў Сейм Польшчы. «Права і справядлівасць» хоць і набрала на іх найбольшую колькасць галасоў, але іх было недастаткова для фарміравання большасці. У выніку да ўлады прыйшла цяперашняя кааліцыя на чале з Дональдам Тускам. Маравецкі выступае як апазіцыя да цяперашняга ўрада.
«У гэты дзень мы пакажам, што Польшча не асуджаная на хаос, пасрэднасць і нявыкананыя абяцанні. Мы пакажам, што ёсць сіла, якая валодае вопытам, мужнасцю, праграмай і гатоўнасцю зноў узяць на сябе адказнасць за краіну», — заявіў Маравецкі.
Нядаўна аб’яднанне «Развіццё+» правяло першае афіцыйнае мерапрыемства. Былі прадстаўленыя два даклады, якія ахопліваюць пытанні дэмаграфіі і міграцыі. Для вырашэння дэмаграфічных праблем у Польшчы «Развіццё+» прапануе ўвесці дапамогу для бацькоў дзяцей ва ўзросце да трох гадоў у памеры мінімальнага заробку. Маравецкі з калегамі лічыць, што такая праграма забяспечыць стабільнасць маладым сем’ям і будзе ўлічвацца ў якасці пенсійнага капіталу за перыяд, праведзены з дзіцем у сям’і.
У сферы міграцыі аб’яднанне выступае за ўвядзенне квот на працоўныя візы, якія павінны выдавацца з улікам бальнай сістэмы і культурнай блізкасці. Таксама прапануецца стварыць службу паводле ўзору амерыканскай ICE, якая будзе адказваць за кіраванне міграцыяй і дэпартацыю асоб, што парушаюць заканадаўства аб пражыванні.
