Зорка беларускага тэатра і кіно, «Вольны Купалавец» Ігар Сігоў падзяліўся навінамі пра змены ў сваім жыцці. Намінант на прэмію «Оскар», які пасля эміграцыі пэўны час працаваў у таксі, цяпер сеў за руль гарадскога аўтобуса.
Пра свой першы працоўны дзень у новай якасці артыст паведаміў на старонцы ў Facebook з уласцівым яму аптымізмам:
«Што ў мяне новага?.. сёння мой першы працоўны дзень у якасці кіроўцы аўтобуса))).. асвоіў яшчэ адно хобі)).. чаму б і не )).. Польшча дае такія магчымасьці, знайсці штось для душы))..».
Колькі часу займае «змена амплуа»?
Пад пастом разгарнулася жывая дыскусія. Каментатары пачалі цікавіцца прагматычным бокам пытання: наколькі складана акцёру было атрымаць новую кваліфікацыю. Ігар патлумачыў, што шлях у кабіну аўтобуса не быў імгненным — увесь працэс, уключаючы навучанне і іспыты, заняў каля чатырох месяцаў.
Дзе сустрэць артыста? (Маршрут і графік)
На пытанні сяброў і прыхільнікаў, куды ехаць па аўтограф, Ігар адказаў максімальна адкрыта: Гродзіск-Мазавецкі (Grodzisk Mazowiecki), нумар маршруту – 29. Артыст пераехаў з Варшавы ў камфортны і невялікі горад ў 30 км на паўднёвы захад ад цэнтра сталіцы. Там ён зараз і працуе.
«Гэты тыдзень працую з 13.00 да 23.00, а наступны з ранку до 13.00 ))», – адказаў ён на пытанні цікаўных.
«Чакаем у Херсоне пасля перамогі»
Пост сабраў шмат слоў падтрымкі. Адным з самых кранальных стаў каментар ад украінскага сябра: «Гэта таксама патрэбна, але не забывай, што ты акцёр. Чакаем у Херсоне пасля нашай перамогі!»
Падпісвайцеся на культурныя навіны Reform.news у Telegram
