Тэмпы росту беларускай эканомікі будуць і далей запавольвацца ў 2026 годзе. Прырост ВУП чакаецца на ўзроўні 0,5–1,5%. Пра гэта гаворыцца ў макрапрагнозе для Беларусі на наступны год, апублікаваным праектам «Маніторынг эканомікі Беларусі».
«Рост ВУП запаволіцца з каля 4% у 2023–2024 гг. да прыкладна 1,1% у 2025 г. і 0,5–1,5% у 2026 г. Запаволенне расійскай эканомікі і адсутнасць прасторы для значнага ўзмацнення ўнутраных стымулаў будуць абмяжоўваць рост эканамічнай актыўнасці ў Беларусі з боку попыту. Вычарпанне патэнцыялу ўцягнення ў вытворчасць свабодных працоўных рэсурсаў і нізкая аддача ад інвестыцый стануць стрымліваючымі фактарамі з боку прапановы.
Уклад сукупнага попыту і жорсткага рынку працы ў прырост цэн знізіцца ў 2026 г., але гэта зніжэнне будзе кампенсавана частковай рэалізацыяй інфляцыйнага навесу і павышэннем рэгуляваных цэн і тарыфаў. У выніку інфляцыя захаваецца каля 7% г/г у 2026 г. Дэфіцыт знешняга гандлю таварамі і паслугамі прагназуецца каля 2% ВУП у 2026 г., чаму адпавядае ўмеранае аслабленне беларускага рубля на 3–7% за год у тэрмінах кошыка валют», — гаворыцца ў прагнозе.
Рызыкі для прагнозу застаюцца высокімі як з боку ўнутранай эканамічнай палітыкі, так і знешніх умоў. Аўтары прагнозу лічаць, што прастора для масіраванага бюджэтнага стымулявання ў Беларусі вычэрпваецца. Верагоднасць далейшага скарачэння попыту ў РФ нясе пагрозу больш моцнага аслаблення эканамічнай актыўнасці ў Беларусі. Развіццё ваенна-палітычнай актыўнасці ў рэгіёне можа ствараць для беларускай эканомікі як станоўчыя, так і негатыўныя рызыкі.
У дакуменце адзначаецца, што перагрэў беларускай эканомікі ў другой палове 2025 года скараціўся на фоне аслаблення ўнутранай спажывецкай актыўнасці і скарачэння экспарту. Пры гэтым унутраны попыт па-ранейшаму заставаўся звышмерным. У выніку ў чацвёртым квартале маштаб перагрэву эканомікі склаў каля 1%.
У 2026 годзе тэмпы росту эканомікі будуць блізкія да патэнцыйных, якія ацэньваюцца ў 1,5–2% у год з улікам перадумоваў аб нейтральнасці эканамічнай палітыкі і росту ВУП Расіі каля 1,5%. Сукупны попыт у наступным годзе паступова вернецца да збалансаванага стану пасля перагрэву. Базавы сцэнар прадугледжвае, што намінальны доларавы ВУП можа дасягнуць 100 млрд долараў у 2027 годзе.
Заработныя платы ў наступным годзе будуць працягваць расці, аднак праблема дэфіцыту працоўнай сілы будзе аслабляцца. Тэмпы росту заробкаў знізяцца з 10% у 2025 годзе да 3–6% у год у наступныя два гады. Сярэдні заробак у наступным годзе можа наблізіцца да 3 тыс. рублёў.
Нагадаем, афіцыйны прагноз сацыяльна-эканамічнага развіцця на 2026 год, ухвалены Лукашэнкам, прадугледжвае рост ВУП на 2,8%. На днях ЕАБР таксама прадставіў свой макрапрагноз для краін-удзельніц банка. Рост беларускай эканомікі ў наступным годзе ацэньваецца ў 1,8%.
