Прэзідэнт Польшчы Караль Наўроцкі пазбавіў прэзідэнта Украіны Уладзіміра Зяленскага Ордэна Белага арла — найвышэйшай дзяржаўнай узнагароды Польшчы. Рашэнне было прынята ў сувязі з тым, што Асобны цэнтр спецыяльных аперацый «Поўнач» Сіл спецыяльных аперацый УСУ атрымаў найменне ў гонар Герояў УПА.
«Для пераважнай большасці польскага грамадства Украінская паўстанцкая армія — УПА — застаецца перш за ўсё фарміраваннем, адказным за жорсткія злачынствы, учыненыя супраць грамадзян Рэспублікі Польшча падчас Другой сусветнай вайны», — адзначыў Наўроцкі ў відэазвароце.
Наўроцкі заявіў, што прысваенне вайсковаму падраздзяленню імя герояў УПА выходзіць за межы ўнутранай справы Украіны. Польшча ўказвала Украіне на важнасць гэтага пытання і перадавала сваю пазіцыю, але ўкраінскі бок не стаў змяняць сваё рашэнне.
Прэзідэнт Польшчы назваў рашэнне ўкраінскіх улад абуральным і глыбока расчаравальным.
«Яно наносіць удар не толькі па гістарычнай памяці. Яно наносіць удар і па даверы, які будаваўся гадамі і ў апошнія месяцы. Яно падрывае аснову прымірэння. Яно падрывае перакананне ў тым, што праўда можа быць агульнай мовай нашых народаў», — лічыць Наўроцкі.
Наўроцкі падкрэсліў, што Ордэн Белага арла — асаблівая ўзнагарода, якая патрабуе павагі да каштоўнасцяў польскага грамадства.
Прэзідэнт Польшчы падкрэсліў, што яго рашэнне не накіравана супраць украінскага народа і не азначае змянення стратэгічнага курсу польскай палітыкі бяспекі.
«Мы падтрымлівалі і падтрымліваем Украіну, бо разумеем, што расійская агрэсія ўяўляе пагрозу бяспецы Польшчы і ўсёй Еўропы. У гэтай ацэнцы нічога не змянілася», — адзначыў Наўроцкі.
Ён падкрэсліў, што Польшча будзе абараняць памяць сваіх грамадзян і адстойваць свае нацыянальныя інтарэсы і каштоўнасці. Ён заклікаў Украіну разабрацца з цяжкімі старонкамі сваёй гісторыі, перш чым уступіць у Еўрасаюз.
«Таму сённяшняе рашэнне носіць не толькі сімвалічны характар. Гэта таксама папераджальны сігнал. Ёсць межы, якія нельга пераступаць у польска-ўкраінскіх адносінах. Гэта таксама заклік да нашых суседзяў: вярніцеся на шлях праўды і ўзаемнай павагі», — заявіў Наўроцкі.
