Савет міністраў пастановай №304 ад 19 чэрвеня зацвердзіў Палажэнне аб парадку прыцягнення асобы да выканання грамадскіх работ і парадку абвяшчэння афіцыйнага папярэджання аб адміністрацыйнай адказнасці за ўхіленне ад іх выканання. Дакумент сёння апублікаваны на Нацыянальным прававым інтэрнэт-партале і ўступіў у сілу з 19 чэрвеня.
У адпаведнасці з палажэннем, мясцовы орган улады павінен вызначыць упаўнаважаную асобу, якая будзе займацца ўлікам паступіўшых пастаноў суда аб адміністрацыйных спагнаннях у выглядзе грамадскіх работ, а таксама займацца арганізацыяй выканання такой пастановы.
Упаўнаважаная асоба павінна на працягу 3 дзён з моманту паступлення пастановы суда паведаміць указанаму ў ёй чалавеку пра неабходнасць з’явіцца для атрымання накіравання на выкананне грамадскіх работ.
На працягу 10 дзён упаўнаважаная асоба павінна вызначыць арганізацыю, у якой будуць адпрацоўвацца грамадскія работы, і канкрэтныя віды работ. Яна не павінна супадаць з асноўным месцам працы, службы або вучобы парушальніка.
Таксама ўпаўнаважаная асоба па ўзгадненні з арганізацыяй павінна скласці графік выканання грамадскіх работ. Яна ж тлумачыць парушальніку ўмовы выканання работ, правы і абавязкі і г.д.
У накіраванні на выкананне грамадскіх работ павінны быць указаны назва арганізацыі, від работ, тэрмін іх выканання, час пачатку і заканчэння работ штодня, персанальныя даныя ўпаўнаважанай асобы.
Палажэннем таксама вызначаны парадак паведамлення парушальніку пра адказнасць за адмову выконваць грамадскія работы і форма такога паведамлення.
