Прэзідэнт Украіны Уладзімір Зяленскі пацвердзіў, што Кіеў згодны на спыненне агню 9-11 мая.
Зяленскі нагадаў, што Украіна абяцала дзейнічаць люстрана ў адказ на адмову Расіі спыніць агонь з 6 мая, але Расія пагадзілася правесці абмен палоннымі ў фармаце 1000 на 1000.
«У гэтыя дні было шмат зваротаў і сігналаў адносна канфігурацыі заўтрашняга дня ў Маскве ў сувязі з нашымі ўкраінскімі далёкабойнымі санкцыямі. Прынцып люстранасці ў нашых дзеяннях добра вядомы і быў даведзены да расійскага боку. Дадатковым аргументам для Украіны пры вызначэнні нашай пазіцыі заўсёды застаецца вырашэнне аднаго з ключавых гуманітарных пытанняў гэтай вайны, а менавіта — вызваленне ваеннапалонных. Красная плошча для нас менш важная, чым жыцці ўкраінскіх палонных, якіх можна вярнуць дадому.
Менавіта таму сёння ў рамках перамоўнага працэсу пры пасярэдніцтве амерыканскага боку мы атрымалі згоду Расіі правесці абмен ваеннапалоннымі ў фармаце 1000 на 1000. Таксама павінен быць усталяваны рэжым цішыні 9, 10 і 11 мая. Украіна паслядоўна працуе над вяртаннем сваіх людзей з расійскага палону. Я даручыў нашай камандзе аператыўна падрыхтаваць усё неабходнае для абмену», — заявіў Зяленскі.
Прэзідэнт Украіны падзякаваў Дональду Трампу і яго камандзе за дыпламатычны ўдзел.
«Разлічваем, што ЗША забяспечаць выкананне дамоўленасцяў расійскім бокам», — дадаў ён.
Дональд Трамп абвясціў пра трохдзённае спыненне агню паміж Украінай і Расіяй 9, 10 і 11 мая. Таксама бакі павінны правесці абмен палоннымі.
