На беларуска-літоўскай мяжы затрымалі 43-гадовага грамадзяніна Польшчы, які знаходзіўся ў вышуку ў ЕС, паведамляе памежная служба Літвы.
Увечары 4 жніўня ў пункт пропуску «Мядзінінкай» прыбыў грамадзянін Польшчы на аўтамабілі Mercedes-Benz AMG G63 з польскімі нумарамі. Падчас праверкі літоўскія памежнікі ўстанавілі, што мужчына знаходзіцца ў вышуку паводле еўрапейскага ордара з кастрычніка 2024 года за ўхіленне ад адбывання пакарання.
Акрамя гэтага, аўтамабіль паляка знаходзіўся ў вышуку як рэчавы доказ па крымінальнай справе. Машына, як мяркуецца, была выкрадзена або незаконна прысвоена. Пасведчанне аб рэгістрацыі аўтамабіля таксама знаходзілася ў вышуку як рэчавы доказ па крымінальнай справе.
Кіроўца патлумачыў, што не збіраўся ўязджаць у Літву. Паводле яго слоў, ён прыехаў на мяжу, каб завяршыць працэдуру часовага ўвозу аўтамабіля ў Беларусі, і збіраўся разгарнуцца паміж пунктамі пропуску. Аднак такой магчымасці не аказалася, і мужчыну давялося ўехаць на тэрыторыю Літвы.
Паляка змясцілі ў СІЗА. Пачата дасудовае расследаванне.