Спецпасланнік прэзідэнта ЗША Стыў Уіткаф і сакратар СНБА Украіны Рустэм Умераў назвалі перамовы, што прайшлі ў Фларыдзе, прадуктыўнымі і канструктыўнымі. Яны апублікавалі два амаль ідэнтычныя паведамленні.
«На працягу апошніх трох дзён ва Фларыдзе ўкраінская дэлегацыя правяла шэраг прадуктыўных і канструктыўных сустрэч з амерыканскімі і еўрапейскімі партнёрамі», — гаворыцца ў паведамленнях абодвух кіраўнікоў дэлегацый.
Украіну на перамовах, акрамя Умерава, прадстаўляў начальнік Генштаба Андрэй Гнатаў. З амерыканскага боку ўдзельнічалі таксама Джарэд Кушнер і супрацоўнік Белага дома Джош Груенбаўм. Акрамя гэтага, да абмеркаванняў далучыліся ключавыя дарадцы па нацыянальнай бяспецы еўрапейскіх краін.
«Асобна адбылася канструктыўная сустрэча ў фармаце ЗША — Украіна, падчас якой асноўная ўвага была засяроджаная на чатырох ключавых дакументах: працяг апрацоўкі 20-пунктнага плана; узгадненне пазіцый па шматбаковым рамкавым пагадненні аб гарантыях бяспекі; узгадненне пазіцый па двухбаковым пагадненні аб гарантыях бяспекі з боку ЗША; а таксама працяг апрацоўкі эканамічнага плана развіцця (плана росквіту)», — адзначыў Умераў.
Асобная ўвага была нададзена часовым рамкам і далейшым крокам. Умераў падкрэсліў, што Украіна застаецца адданай дасягненню справядлівага і ўстойлівага міру, спыненню забойстваў і забеспячэнню гарантаванай бяспекі, каб стварыць умовы для пасляваеннага аднаўлення, стабільнасці і доўгатэрміновага росквіту.
«Мір павінен быць не толькі спыненнем баявых дзеянняў, але і годнай асновай для стабільнай будучыні. Украіна высока цэніць лідарства і падтрымку Злучаных Штатаў, а таксама далейшую цесную каардынацыю з партнёрамі на наступных этапах гэтай важнай працы», — напісаў ён.
Аналагічнае паведамленне размясціў Уіткаф.
У падобным ключы ён ахарактарызаваў і сустрэчы з расійскім пасланнікам Кірылам Дзмітрыевым. Паводле слоў Уіткафа, мінулыя сустрэчы былі прадуктыўнымі і канструктыўнымі.
«Расія па-ранейшаму цалкам адданая дасягненню міру ва Украіне. Расія высока цэніць намаганні і падтрымку Злучаных Штатаў у ўрэгуляванні ўкраінскага канфлікту і аднаўленні глабальнай бяспекі», — гаворыцца ў заяве Уіткафа.
Кірыл Дзмітрыеў быў больш лаканічны. У сваім акаўнце ў Х ён зрабіў рэпост паведамлення Уіткафа, а таксама апублікаваў яшчэ адно паведамленне.
«Дзякуй, Маямі, наступны раз — Масква», — напісаў ён.
