Прэм’ер-міністр Беларусі Аляксандр Турчын правёў тэлефонную размову з прэм’ер-міністрам Азербайджана Алі Асадавым 6 сакавіка.
Бакі абмяняліся меркаваннямі аб сітуацыі ў рэгіёне і падкрэслілі ўзаемную занепакоенасць эскалацыяй канфлікту на Блізкім Усходзе.
Асадаў праінфармаваў Турчына аб «атаках Ірана супраць Азербайджана з выкарыстаннем беспілотных лятальных апаратаў», паведамляе прэс-служба ўрада Азербайджана.
«Аляксандр Турчын выказаў занепакоенасць у сувязі з інцыдэнтам у Нахічэвані і шчырую падтрымку ў адрас кіраўніцтва Азербайджана і дружалюбнага азербайджанскага народа», — паведамляе прэс-служба беларускага ўрада.
Турчын і Асадаў пацвердзілі важнасць захавання міру і стабільнасці ў рэгіёне, выказаліся за як мага хутчэйшае вяртанне сітуацыі ў дыпламатычнае рэчышча.
Таксама абмяркоўваліся перспектывы развіцця супрацоўніцтва паміж Беларуссю і Азербайджанам, уключаючы каляндар двухбаковых мерапрыемстваў на вышэйшым і высокім узроўні, рэалізацыю шэрагу канкрэтных праектаў.
Нагадаем, учора ў Нахічэвані ў раёне аэрапорта выбухнулі беспілотнікі. МЗС Азербайджана асудзіла атаку Ірана. У сваю чаргу ў Іране заявілі, што не атакавалі тэрыторыю Азербайджана.
