Генеральная пракуратура Беларусі накіравала ў Вярхоўны суд крымінальную справу ў дачыненні да Аляксандра Буглая, якога абвінавачваюць у генацыдзе беларускага народа ў гады Другой сусветнай вайны. Справа ў дачыненні да яго вылучана ў асобную вытворчасць.
Паводле інфармацыі Генпракуратуры, Буглай узначальваў ваенізаванае падраздзяленне пад назвай «Белая каманда». Пазней яно было рэарганізавана ў роту, затым — у батальён, які са снежня 1943 года стаў называцца «Баявы добраахвотніцкі батальён імя Буглая».
Паводле матэрыялаў справы, Буглай дзейнічаў у складзе ўзброеных фарміраванняў пры 551-й палявой камендатуры і Гомельскай палявой жандармерыі, выконваючы загады нацысцкага кіраўніцтва. На тэрыторыі Гомельскай, Мінскай і Магілёўскай абласцей ён арганізоўваў і праводзіў карныя аперацыі пад падставай барацьбы з савецкімі партызанамі.
У пракуратуры заяўляюць, што ў выніку гэтых дзеянняў былі расстраляныя не менш як 174 мірныя жыхары, у тым ліку не менш як 27 дзяцей, спаленыя не менш як 238 жылых дамоў і іншых будынкаў, выкрадзеная маёмасць мясцовых жыхароў, а не менш як 77 чалавек былі вывезеныя на прымусовыя работы.
Следчая група сабрала доказы, якія пацвярджаюць прад’яўленыя абвінавачанні.
Гэта восьмая крымінальная справа, накіраваная ў суд і вылучаная з асноўнай справы аб генацыдзе беларускага народа ў гады Вялікай Айчыннай вайны. Раней прысуды былі вынесеныя памерлым Уладзіміру Катруку, Канстанціну Смоўскаму, Сямёну Серафімовічу, Осіпу Вінніцкаму, Аляксандру Ярмольчыку, Гансу Зіглінгу і Антанасу Гецявічусу.
