Міністр абароны Віктар Хрэнін не мае намеру займацца перавыхаваннем нядбайных работнікаў, якіх паводле распараджэння Аляксандра Лукашэнкі забяруць у войска. Пра гэта ён заявіў сёння пасля даклада Лукашэнку.
Учора апошні на селектарнай нарадзе распарадзіўся адпраўляць у войска недысцыплінаваных і нядобрасумленных работнікаў, занятых на ўборачнай кампаніі. Сёння Хрэнін адсправаздачыўся, як будзе выконвацца гэтае даручэнне.
«Я далажыў, як будзе выконвацца даручэнне кіраўніка дзяржавы. Да гэтай работы цяпер будуць падключаныя ваенкамы, якія найбліжэйшым часам правядуць сумесныя нарады з кіраўнікамі мясцовых органаў улады на месцах і вызначацца з паслядоўнасцю.
Далей, як сказаў Прэзідэнт, не з кабінетаў, а ў палі выедуць у сельскагаспадарчыя прадпрыемствы, арганізуюць з імі ўзаемадзеянне і будуць працаваць, аказваючы дапамогу і падтрымку. Ну а хто ўжо зусім не хоча працаваць, мы іх прызавём на вайсковыя зборы, дзе павысім іх баявую вывучку», — сказаў ён.
Пры гэтым, паводле яго слоў, перавыхоўваць тых, хто правініўся, не будуць.
«На перавыхаванне мы нікога браць не будзем. Будзем браць для таго, каб удасканальваць баявую вывучку нашых людзей, асабліва ваеннаабавязаных», — сказаў ён.
Як адсправаздачыліся ў Мінабароны, пасля даклада Хрэнін сабраў сваю селектарную нараду з ваеннымі камісарыятамі абласцей.
