Беларусь не рыхтуе ўмацаваныя раёны на мяжы з Украінай, а тое, што Кіеў прымае за будаўніцтва вайсковай інфраструктуры, з’яўляецца добраўпарадкаваннем і стварэннем зон адпачынку. Пра гэта заявіў міністр абароны Беларусі Віктар Хрэнін паводле вынікаў даклада Аляксандру Лукашэнку 22 ліпеня, паведамляе БелТА.
Хрэнін назваў ваенна-палітычную абстаноўку вакол Беларусі спакойнай і падрабязна расказаў пра сітуацыю на беларуска-ўкраінскай мяжы.
Цяпер, паводле слоў Хрэніна, Беларусь не бачыць, што Украіна рыхтуецца да агрэсіўных дзеянняў на мяжы з Беларуссю.
«На сённяшні дзень мы не бачым, што ўкраінскія фарміраванні, якія забяспечваюць прыкрыццё сваёй мяжы, рыхтуюцца да нейкіх агрэсіўных, актыўных дзеянняў. Мы бачым, што яны займаюцца абарончай дзейнасцю. Ну, гэта і лагічна, што на сённяшні дзень, нягледзячы на тое, што ў інфармацыйнай прасторы гучыць што заўгодна, для іх зусім не патрэбнае напружанне на нашай мяжы», — заявіў Хрэнін.
Сёння на ўкраінскай мяжы знаходзіцца мінімальны камплект сіл спецыяльных аперацый, якія дзейнічаюць ва ўзаемадзеянні з памежнікамі.
«Самае галоўнае — мы павінны быць гатовыя да любых раптоўных дзеянняў. Таму гэты мінімальны камплект войскаў мы там трымаем», — растлумачыў Хрэнін.
Хрэнін пракаментаваў заявы ўкраінскага боку пра будаўніцтва вайсковай інфраструктуры каля мяжы з Украінай.
«Мы гэта, вядома, чулі і глядзім на гэта з усмешкай. Тыя заявы, што мы рыхтуем нейкія абарончыя раёны… Мы выдатна разумеем, што гэта робіцца толькі з адной мэтай: стварыць напружанне ў нашым грамадстве, ды і ва ўкраінскім таксама, забіваючы клін і робячы з нас лютых ворагаў. Гэта не адпавядае ніякай рэчаіснасці», — заявіў міністр абароны.
Хрэнін заявіў, што паводле даручэння Лукашэнкі ўздоўж заходняй і паўночнай межаў Беларусі абсталяваныя пяць умацаваных раёнаў, але планаў ствараць іх на ўкраінскай мяжы няма.
«Гэта даручэнне выканана. Пяць умацаваных раёнаў уздоўж заходняй і паўночнай межаў абсталяваныя, ідзе іх актыўнае ўдасканаленне. На паўднёвай мяжы нават у планах няма стварэння нейкіх умацаваных раёнаў, абарончых рубяжоў», — сказаў Хрэнін.
Кіраўнік Мінабароны заявіў, што добраўпарадкаванне дарог і рэканструкцыя мастоў на поўдні Беларусі вядзецца ў рамках праграмы развіцця Палесся.
«Там цяпер актыўна вядзецца рэканструкцыя і рамонт мастоў, добраўпарадкаванне дарог, абсталёўваюцца новыя зоны адпачынку для грамадзян. Усё гэта ўспрымаецца так, нібыта ідзе нейкая падрыхтоўка. Гэта не адпавядае рэчаіснасці, ды і людзям трэба прапускаць гэта міма вушэй», — заявіў Хрэнін.
Нагадаем, Украіна раней заяўляла пра будаўніцтва баз захоўвання боепрыпасаў і ГЗМ, а таксама пра будаўніцтва дарожнай інфраструктуры для ваенных мэтаў у Беларусі каля ўкраінскай мяжы.
