Цэны на нафту працягваюць расці на фоне эскалацыі канфлікту паміж ЗША і Іранам. Сёння на біржы ICE кошт найбліжэйшага ф’ючарса на нафту маркі Brent перавысіў 95 долараў ЗША.
Ён дасягнуў 95,05 долара за бараль. Затым адбылася невялікая карэкцыя, але ф’ючарс працягвае гандлявацца на ўзроўні каля 95 долараў за бараль.
Папярэдні раз такія цэны фіксаваліся на пачатку чэрвеня.
Варта адзначыць, што, акрамя абмену ўдарамі паміж Іранам і ЗША, які працягваецца, іранскія проксі ў Емене — хусіты — пачалі пагражаць суднам, звязаным з Саудаўскай Аравіяй. Нагадаем, Саудаўская Аравія мае нафтавы тэрмінал у Чырвоным моры, праз які дагэтуль экспартавала частку сыравіны на фоне праблем з суднаходствам у Армузскім праліве. Аднак еменскія паўстанцы маюць магчымасць атакаваць судны ў Баб-эль-Мандэбскім праліве, што ўскладняе выхад суднаў з Чырвонага мора ў Індыйскі акіян.
