МНС падвяло вынікі праходжання навальнічнага фронту, які пракаціўся ўначы па Беларусі. Парывы ветру дасягалі 29 м/с.
Паводле інфармацыі міністэрства, пацярпела дзіця 2018 года нараджэння. Уначы ў кемпінгу каля вёскі Корбузі Вілейскага раёна дрэва ўпала на турыстычны домік.
Пашкоджанні зафіксаваныя ў 57 населеных пунктах па ўсёй краіне. Найбольш — у 27 населеных пунктах — пацярпела Гомельская вобласць.
«У Віцебскай вобласці пашкоджаны дахі 12 жылых дамоў, 6 сельскагаспадарчых і 9 гаспадарчых пабудоў, у Гродзенскай вобласці — дахі 44 жылых дамоў, у Мінскай вобласці — дахі 7 жылых дамоў, 5 гаспадарчых пабудоў», — гаворыцца ў зводцы МНС.
Па краіне зафіксавана 280 выпадкаў падзення дрэў. Пашкоджаны 14 аўтамабіляў.
З-за падзення дрэў на чыгуначныя шляхі адбылася затрымка ў руху 2 цягнікоў у Маладзечанскім раёне Мінскай вобласці. На тэрыторыі краіны фіксаваліся перыядычныя парушэнні электразабеспячэння населеных пунктаў. Адключэнні аператыўна ліквідуюцца аварыйнымі брыгадамі.
Ветраломы таксама зафіксаваныя ў лясах.
«Сярод найбольш пацярпелых лясгасаў — Жлобінскі і Вілейскі доследны. Ужо цяпер ідзе гаворка пра пастаноўку на ўлік каля 200 га і 150 га лясных масіваў адпаведна, якія патрабуюць правядзення суцэльных санітарных высечак. Гэта папярэднія лічбы», — паведамілі ў прэс-службе Мінлясгаса.
Бураломы таксама былі зафіксаваныя ў Светлагорскім і Васілевіцкім лясгасах.
