Упраўленне па справах іншаземцаў Польшчы апублікавала чарговую справаздачу аб міграцыйнай сітуацыі з грамадзянамі Беларусі. Яна выйшла раней, чым штомесячная справаздача аб працы ўпраўлення.
З тэматычнай справаздачы вынікае, што ў ліпені толькі 14 грамадзян Беларусі атрымалі міжнародную абарону, у тым ліку дзесяць — у выглядзе статусу бежанца, а чацвёра — дадатковай абароны. Адначасова былі вынесены 82 адмоўныя рашэнні.
У справаздачы таксама адзначаецца, што сёлета беларусы атрымалі 165 адмоваў у міжнароднай абароне. А ўзровень яе прызнання ў гэтым годзе знізіўся да 79%. З пачатку года беларусам былі прадастаўлены 246 статусаў бежанца і 376 — дадатковай абароны.
Ва ўпраўленні таксама вырашылі растлумачыць гэтыя тэндэнцыі.
«Павелічэнне колькасці выпадкаў прадастаўлення статусу бежанца ў 2026 годзе сведчыць пра змяненне профілю заяўнікаў. У цяперашні час тыя, хто выбірае гэтую працэдуру, маюць індывідуальныя, дакументальна пацверджаныя сведчанні палітычнага пераследу ў Беларусі. Раней (2022–2024 гг.) пераважалі заявы, заснаваныя на агульнай сістэмнай пагрозе ў краіне, што давала мігрантам права на дадатковую абарону», — гаворыцца ў справаздачы.
«Павелічэнне колькасці адмоваў (165 толькі ў 2026 годзе) звязана са значна больш строгай праверкай заяў з боку Упраўлення па справах іншаземцаў. Заявы адхіляюцца ў дачыненні да тых, хто спрабуе выкарыстаць працэдуру атрымання статусу бежанца выключна ў эканамічных мэтах або хто не можа прадэманстраваць рэальную рызыку рэпрэсій у выпадку вяртання ў сваю краіну», — дадалі ва ўпраўленні.
На 1 жніўня ўпраўленне працягвала разглядаць 3154 заявы беларусаў аб прадастаўленні міжнароднай абароны, у тым ліку 2959 — у першай і 195 — у другой інстанцыі.
«Назапашванне амаль 3000 спраў у першай інстанцыі ў спалучэнні з адначасовым спыненнем прытоку новых заяў (усяго 1000 заяў у 2026 годзе) азначае, што Упраўленне па справах іншаземцаў цяпер канцэнтруе свае рэсурсы на апрацоўцы назапашаных спраў за рэкордныя 2023–2024 гады», — патлумачылі ва ўпраўленні.
Паводле даных упраўлення, на 1 жніўня ў Польшчы мелі дакументы, якія даюць права на знаходжанне, 133 057 грамадзян Беларусі, у тым ліку:
- 77 964 — мелі часовы від на жыхарства,
- 41 249 — пастаянны від на жыхарства,
- 9902 — дадатковую абарону,
- 2582 — статус доўгатэрміновага рэзідэнта ЕС,
- 1237 — статус бежанца,
- 214 — часовую абарону,
- 179 — іншыя падставы.
У 2026 годзе ўжо былі разгледжаны 17 516 заяў беларусаў аб выдачы часовага віду на жыхарства. Па 14 315 заявах было прынята станоўчае рашэнне, у 1324 выпадках — адмоўлена, 633 справы прыпынены, а 1424 пакінуты без разгляду.
За сем месяцаў упраўленне таксама разгледзела 3043 заявы ад грамадзян Беларусі на атрыманне пастаяннага віду на жыхарства. У 2248 выпадках такі від быў прадастаўлены, у 519 — адмоўлена, 172 справы прыпынены, а 104 пакінуты без разгляду.
У студзені—ліпені ўпраўленне таксама прыняло рашэнні па 758 заявах на атрыманне статусу доўгатэрміновага рэзідэнта ЕС. 596 заяўнікаў яго атрымалі, 75 атрымалі адмову, 66 спраў былі прыпынены, а 21 пакінута без разгляду.
