Аляксандру Лукашэнку прапанавалі стварыць «інтэлектуальны спецназ». Так будучых выпускнікоў цэнтра па падрыхтоўцы кадраў перспектыўных напрамкаў назваў міністр адукацыі Андрэй Іванец. На нараду, прысвечаную стварэнню цэнтра, былі запрошаны прадстаўнікі ўрада, Акадэміі навук, мясцовых органаў улады, а таксама ВНУ.
Адкрываючы нараду, Аляксандр Лукашэнка падкрэсліў, што сістэма адукацыі павінна быць у прыярытэце. На яго думку, адукацыя і навука знаходзяцца на асаблівым этапе развіцця.
“Адна з найважнейшых задач для краіны сёння (магчыма, гэта самая галоўная задача) — гэта мадэрнізацыя эканомікі на інавацыйнай аснове.
Мы навучыліся шмат што рабіць, але ў асноўным паўтараем тое, што ўжо ў свеце зроблена: капіруем, нешта дадаем сваё, а часам нічога не дадаем. Гэта натуральна — усе краіны такім чынам дзейнічаюць”, — сказаў ён.
Ён дадаў, што перадавыя краіны могуць называцца такімі ў тым выпадку, калі яны могуць вырабляць нешта сваё ад пачатку да канца, і паскардзіўся, што ў Беларусі нельга пахваліцца многімі распрацоўкамі.
“Як і ва ўсім свеце, ствараем новыя вытворчасці (але вельмі недастаткова), яны працуюць аўтаномна, з мінімальным удзелам або нават без удзелу чалавека. Маштабаванне падобных высокатэхналагічных вытворчасцяў — залог нашага дабрабыту ў будучыні.
Але для такой сур’ёзнай інавацыйнай трансфармацыі эканомікі нам патрэбныя спецыялісты, здольныя канкурыраваць па ўзроўні ведаў з вядучымі сусветнымі школамі. І не проста канкурыраваць, а ствараць якасны і канкурэнтаздольны беларускі прадукт. Задача нумар адзін для сістэмы вышэйшай адукацыі”, — сказаў ён.
Лукашэнка прапанаваў вызначыцца з перспектыўнымі напрамкамі.
“Сёння нам трэба вызначыцца, якія ж гэта перспектыўныя напрамкі, без якіх ні адна дзяржава абысціся не можа”, — сказаў ён.
У сваім дакладзе Іванец абазначыў гэтыя напрамкі: авіябудаванне, лічбавыя тэхналогіі, біятэхналогіі і шэраг іншых сфер для падрыхтоўкі кадраў па інжынерных спецыяльнасцях. Паводле яго слоў, на базе шэрагу ВНУ ўжо рэалізуюцца эксперыментальныя праграмы падрыхтоўкі, але асвоіць іх могуць не ўсе студэнты.
“Гэта не значыць, што мы іх дрэнна рыхтуем. Мы іх рыхтуем абсалютна для ўсіх галін нашай эканомікі. Але нам патрэбны свайго роду спецназ. І ў дадзеным выпадку гэта фактычна будзе працяг траекторыі Нацыянальнага дзіцячага тэхнапарка, дзе мы бачым, што канцэнтраванне такіх хлопцаў і дзяўчат было абсалютна апраўданым”, — сказаў ён.
Як звычайна, Лукашэнка паставіў прапанаваную яму ідэю пад сумнеў.
“Навошта частку рэалізуемых эксперыментальных праграм (8 з 18 ужо рэалізуюцца на базе ВНУ) прапануецца пераносіць з нашых вядучых ВНУ ў цэнтр? Яны не спраўляюцца?” — пацікавіўся ён.
“Хачу, каб усе разумелі. Мы не можам сабе дазволіць агаліць кадравы склад вядучых устаноў вышэйшай адукацыі краіны (у пэўнай ступені гэта можа адбыцца), існуючых там навуковых школ, і тым больш аслабіць рэгіянальныя ВНУ. Зніжэнне якасці навучання недапушчальнае. Ад гэтага залежыць міжнародны прэстыж нашай вышэйшай адукацыі і экспарт адукацыйных паслуг”, — працягнуў ён.
Лукашэнка пацікавіўся, што перашкаджае арганізацыі навучання на ВНУшных пляцоўках, у чым будзе заключацца ўнікальнасць адбору і падрыхтоўкі спецыялістаў, як у далейшым іх будуць замацоўваць. Паводле яго слоў, прапануецца набіраць у цэнтр тых, хто ўжо прайшоў навучанне ў ВНУ і гатовы паглыбляцца ў нейкі напрамак, ствараць «цуда-тавары». Іншыя прапануюць набіраць у цэнтры пасля школ.
“Натуральна, туды будуць сцягнуты самыя лепшыя, самыя прагрэсіўныя і таленавітыя людзі для навучання і выкладання. У гэтым трэба аддаваць сабе належнае. Але адтуль павінен выйсці гатовы тавар. А значыць, туды павінны прыйсці моцныя спецыялісты. Ці змогуць гэта зрабіць людзі, якія прыходзяць сёння навучацца пасля сярэдняй школы?” — спытаў ён.
Таксама закраналася пытанне выкарыстання будаванага Цэнтра біялогіі пры БДУ. Лукашэнка цікавіўся перспектывамі аб’екта ў выпадку рэалізацыі розных варыянтаў адукацыі таленавітай моладзі.
“І ці трэба асобны цэнтр ствараць, каб развіваць гэтыя напрамкі. Мы маем магчымасці стварыць асобны цэнтр, але мне здаецца, мы маем магчымасць развіваць у нашых традыцыйных цэнтрах навукі і адукацыі. Я маю на ўвазе ўніверсітэты, інстытуты, Акадэмію навук. Месца хапае, былі б людзі, якія маглі б гэта рухаць”, — сказаў ён.
