Паветраную прастору Польшчы сёння ноччу парушыла расійская крылатая ракета Х-101. Пра гэта заявіў міністр замежных спраў Украіны Андрэй Сібіга.
«Ноччу расійская крылатая ракета Х-101 у рамках масіраванага ўдару Расіі па Украіне перасекла мяжу Польшчы, парушыўшы паветраную прастору НАТА.
Гэта яшчэ адно нагляднае пацвярджэнне таго, што ўмацаванне супрацьпаветранай абароны Украіны цяпер вельмі неабходнае і служыць гарантыяй абароны ўсёй еўраатлантычнай супольнасці.
У агульнай складанасці па Украіне было выпушчана 74 ракеты, многія з якіх балістычныя, і сотні беспілотнікаў», — напісаў ён.
Нагадаем, сёння ноччу польскія вайскоўцы накіроўвалі знішчальнік F-16 на перахоп неапазнанага аб’екта, які заляцеў у паветраную прастору краіны. Аднак аб’ект знік з радараў да таго, як з ім быў устаноўлены візуальны кантакт. У меркаванае месца падзення аб’екта быў накіраваны верталёт. Пазней у незабудаванай мясцовасці каля населенага пункта Тарнава-Калонія прыкладна за 90 км ад мяжы з Украінай была выяўлена 10-метровая варонка і абломкі аб’екта. Мясцовыя жыхары чулі ноччу магутны выбух.
Паводле даных Паветраных сіл УСУ, Расія сёння выкарыстала 61 ракету Х-101. Украінская СПА змагла збіць 54 ракеты гэтага тыпу, зафіксавана траплянне 2 крылатых ракет.
Х-101 — гэта расійская стратэгічная крылатая ракета «паветра-зямля». Яе максімальная далёкасць — 2,5-2,8 тыс. км. Знаходзіцца на ўзбраенні з 2013 года. Маса баявой часткі складае каля 400 кг, ракета таксама нясе 1,25 т паліва. Максімальная хуткасць — 0,78 хуткасці гуку. Можа аснашчацца аскепкава-фугаснай, фугаснай і касетнай баявымі часткамі.
