У Малдове ствараецца парламенцкая група «За дэмакратычную Беларусь». Яе склад фактычна сфарміраваны, а юрыдычнае афармленне групы будзе завершана ў верасні. Пра гэта паведаміў «Парламентскі канал» са спасылкай на дарадцу Ціханоўскай па парламенцкім супрацоўніцтве Анатоля Лябедзьку.
Лябедзька знаходзіцца ў Кішынёве. Ён сустрэўся са спікерам парламента Малдовы Ігарам Гросу, а таксама ўдзельнікамі будучай дэпутацкай групы.
Анатоль Лябедзька перадаў Гросу цёплыя пажаданні ад Святланы Ціханоўскай. Гросу адзначыў, што дэмакратычная Беларусь і Малдова маюць агульную мэту — быць часткай еўрапейскай супольнасці. Малдова гатовая дзяліцца сваім досведам еўраінтэграцыі, правядзення рэформаў.
Гросу падкрэсліў, што стварэнне дэпутацкай групы стане важным крокам для развіцця супрацоўніцтва з дэмсіламі Беларусі.
