Аляксандр Лукашэнка, прызначаючы генпракурорам Дзмітрыя Гару, які да гэтага ўзначальваў Следчы камітэт і працаваў у КДБ, даручыў яму, каб на новай пасадзе той займаўся «сапраўднымі правамі чалавека».
«Органы пракуратуры прызначаныя для кантролю за аднастайным і дакладным выкананнем законаў у нашай краіне. Гэта трэба бачыць. Мы трошкі замусолілі тэзіс пра правы чалавека. Не мы ў гэтым вінаватыя. Але сапраўдныя правы чалавека… Вы павінны кантраляваць, каб гэта ўсё ажыццяўлялася ў Беларусі. Права на працу, заработную плату. Права на справядлівасць кожны чалавек мае ў нас.
Таму, зыходзячы з жыцця і нашага заканадаўства, трэба бачыць сапраўдныя правы нашых беларусаў. І не толькі беларусаў, але і тых людзей, якія да нас прыязджаюць. Я пра гэта шмат гаварыў у частцы міграцыі», — сказаў Лукашэнка.
Трэба адзначыць, што ва Усеагульнай дэкларацыі правоў чалавека не робіцца адрознення паміж рознымі правамі, як гэта спрабуе зрабіць Аляксандр Лукашэнка. У ёй нароўні з правам на працу замацоўваюцца таксама права на свабоду мірных сходаў і асацыяцый, права на свабоду думкі, сумлення і рэлігіі, права свабодна перамяшчацца і выбіраць сабе месца жыхарства ў межах кожнай дзяржавы, права на свабоду перакананняў і на свабоднае выказванне іх і інш.
Сярод іншых даручэнняў новаму генпракурору: ператварыць пракуратуру ў штаб і ўзяць на сябе частку абавязкаў апарата Савета бяспекі, прад’явіць рахунак па справе аб генацыдзе, змагацца з карупцыяй, інакш будзе вайна.
