Камітэт дзяржкантролю раскрыў афёру з падробленымі мінеральнымі ўгнаеннямі.
Паводле версіі КДК, група асоб пад кіраўніцтвам мінчаніна арганізавала закупку ў РФ 154 тон “нізкаякаснага пажыўнага рэчыва”. Тавар выдавалі за вядомую марку азотна-фосфарнага ўгнаення.
Кантрафакт выставілі на біржавыя таргі. Ён быў прададзены сельгаспрадпрыемствам Мінскай і Гродзенскай абласцей, якія ўнеслі поўную перадаплату. Пры гэтым некаторыя гаспадаркі куплялі ўгнаенні за крэдыты.
Для падману гаспадарак выкарыстоўваліся падробленыя сертыфікаты якасці. Аферысты разлічвалі на высокія тэмпы пасяўной кампаніі. Вынікі даследаванняў паказалі, што ў прапанаваных угнаеннях практычна цалкам адсутнічаў фосфар. Яго ўтрыманне было ў 110 разоў меншым за норму.
“Набыты такім чынам кантрафакт уносіўся гаспадаркамі ў глебу, папярэдняя праверка яго якасці не праводзілася. Пры гэтым службовыя асобы адной з сельгасарганізацый нават пасля атрымання інфармацыі пра кантрафакт угнаенняў працягнулі іх выкарыстанне”, — гаворыцца ў паведамленні КДК.
Шкода ацэненая ў 380 тыс. рублёў. Узбуджаная крымінальная справа паводле артыкула аб махлярстве ў асабліва буйной справе. Арганізатар схемы прызнаў віну і супрацоўнічае са следствам. Прымаюцца меры па кампенсацыі шкоды.