Польшча запатрабавала ад кампаніі SpaceX і Ілана Маска тлумачэнняў наконт змяненняў у роўмінгу спадарожнікавага інтэрнэту Starlink.
Нядаўна стала вядома, што з 17 жніўня мяняюцца правілы роўмінгу на шэрагу тарыфных планаў. SpaceX падзяліла глабальную сетку Roam на тры катэгорыі: ЗША і Канада з залежнымі тэрыторыямі, агульны еўрапейскі рэгіён, які ахоплівае некалькі дзясяткаў краін, і астатнія краіны, якія разглядаюцца індывідуальна. Польшча ў еўрапейскі рэгіён не трапіла, хоць там апынуліся яе суседзі.
Цяпер польскім карыстальнікам безлімітнага плана On the Road давядзецца паведамляць пра маючую адбыцца паездку, прадастаўляць пасведчанні асобы, а таксама на іх распаўсюджваецца 30-дзённы ліміт на карыстанне інтэрнэтам за межамі краіны. Лімітаваныя планы абмежаваныя тэрыторыяй краіны. Для новых абанентаў правілы ўступілі ў сілу з 14 ліпеня, а для дзейных – уступяць у сілу з 17 жніўня.
Віцэ-прэм’ер, міністр лічбавізацыі Кшыштаф Гаўкоўскі сёння заявіў, што польскі бок ужо запатрабаваў тлумачэнняў.
“Калі SpaceX і Ілан Маск хочуць працаваць у Польшчы, выкарыстоўваць перавагі польскага рынку і атрымліваць прыбытак ад польскіх кліентаў, ён павінен ставіцца да іх справядліва і на роўных умовах”, – заявіў Гаўкоўскі.
Паводле яго слоў, ён не прымае тлумачэнняў, што “проста так склалася”.
“Менавіта таму я папрасіў SpaceX тэрмінова аднавіць роўнае стаўленне да польскіх кліентаў кампаніі. Калі прычына ў «мясцовых нарматыўных патрабаваннях», я чакаю канкрэтных правілаў. Агульных тлумачэнняў недастаткова. Да польскіх грамадзян нельга ставіцца горш проста таму, што так вырашыла глабальная карпарацыя”, – дадаў ён.
“Польшча — не рынак другога гатунку. Польскія спажыўцы — не спажыўцы другога гатунку”, – падсумаваў Гаўкоўскі.
Трэба адзначыць, што Польшча аплачвае SpaceX тэрміналы, якія выкарыстоўвае Украіна. Спроба Маска абмежаваць іх працу ўжо была падставай для вострай пікіроўкі кіраўніка польскага МЗС Радаслава Сікорскага і бізнесмена ў сетцы Х.
