У Полацкім раёне 70-гадовая жанчына памерла пасля таго, як падчас ежы падавілася долькай апельсіна. Судова-медыцынская экспертыза ўстанавіла, што прычынай смерці стала механічная асфіксія.
Інцыдэнт адбыўся ў чэрвені ў прысутнасці сужыцеля жанчыны. Паводле яго слоў, падчас ежы яна раптам пачала задыхацца, пасля чаго страціла прытомнасць. Мужчына паспрабаваў аказаць ёй дапамогу і выклікаў хуткую. Нягледзячы на рэанімацыйныя мерапрыемствы, выратаваць жанчыну не ўдалося.
Судова-медыцынская экспертыза, праведзеная спецыялістамі Наваполацкага міжраённага аддзела Дзяржаўнай службы медыцынскіх судовых экспертыз, паказала, што дыхальныя шляхі былі перакрытыя долькай апельсіна.
У ДКСЭ адзначаюць, што сярод фактараў, якія павышаюць рызыку падобных здарэнняў, — ужыванне алкаголю і адсутнасць жавальных зубоў. Зыход сітуацыі шмат у чым залежыць ад таго, наколькі хутка і правільна навакольныя змогуць аказаць першую дапамогу. Калі чалавек падавіўся, але працягвае эфектыўна кашляць, гаварыць і дыхаць, перашкаджаць яму не варта. Трэба заставацца побач і заахвочваць кашаль, паколькі ён дапамагае ачысціць дыхальныя шляхі.
Калі чалавек не можа нармальна дыхаць, гаварыць або кашляць, хрыпіць, задыхаецца альбо пачынае сінець, неабходна нахіліць яго наперад і нанесці да пяці рэзкіх удараў асновай далоні паміж лапаткамі. Пасля кожнага ўдару варта правяраць, ці не вызваліліся дыхальныя шляхі.
Калі ўдары па спіне не дапамаглі, неабходна стаць ззаду пацярпелага, абхапіць яго рукамі крыху вышэй за талію, сціснуць адну руку ў кулак і размясціць яе на жываце крыху вышэй за пупок, але ніжэй за рэбры. Затым другой рукой абхапіць кулак і зрабіць рэзкі рух унутр і ўверх. Прыём можна паўтарыць да 5 разоў.
Калі чалавек страціў прытомнасць, яго неабходна асцярожна пакласці на роўную паверхню, выклікаць хуткую дапамогу і пачаць сардэчна-лёгачную рэанімацыю.
Эксперты папярэджваюць: не варта спрабаваць усляпую дастаць іншароднае цела пальцамі з рота. Так можна праштурхнуць прадмет глыбей і цалкам перакрыць дыхальныя шляхі. Выдаляць яго можна толькі ў тым выпадку, калі ён добра бачны і яго лёгка захапіць. Таксама не варта даваць чалавеку, які задыхаецца, ваду, хлеб або іншую ежу. Гэта можа пагоршыць закаркаванне дыхальных шляхоў.