У Беларусі паспяхова завершана рэвізія нарматыўных прававых актаў. Пра гэта перад калегіяй Міністэрства юстыцыі заявіла намесніца кіраўніка адміністрацыі Лукашэнкі Вольга Чупрыс, якая адказвала за рэвізію.
«Нагадаю пра тое, што рэвізія завяршылася дастаткова паспяхова. Больш за палову актаў з тых, якія былі на момант пачатку рэвізіі, скарацілі. Акрамя таго, палепшылі якасць тых нарматыўных прававых актаў, аналіз якіх праводзілі, і гэта вялікае дасягненне», — сказала яна, перадае БелТА.
Паводле яе слоў, на гэтым праца не скончыцца, Міністэрству юстыцыі будзе пастаўлена задача па паляпшэнні якасці заканадаўства, у прыватнасці скарачэнні колькасці адсыльных нормаў.
«Адпаведна і задача будзе Міністэрству юстыцыі пісаць проста, зразумела, даступна, праводзіць прававую экспертызу з тым, каб гэтыя акты рэалізоўваліся ў нашым жыцці, каб не трэба было прыдумляць дадатковых алгарытмаў, каб рэалізоўваць раней напісанае», — дадала яна.
