Грамадзян Беларусі, затрыманых у рамках расследавання забойства расійскага мастака Сямёна Скрапецкага ў Бяла-Падлясцы, адпусцілі. Пра гэта паведаміў прадстаўнік акруговай пракуратуры Марцін Козак.
«Магу паведаміць вам, што двое грамадзян Рэспублікі Беларусь, затрыманых па гэтай справе, былі вызваленыя. Іх датычнасць да гэтай падзеі, якая была прадметам вельмі інтэнсіўнага расследавання, не была пацверджана. Высветлілася, што яны не маюць дачынення да гэтага расследавання і не маюць дачынення да гэтай справы. Таму дапытаныя ў якасці сведкаў, яны былі вызваленыя і больш не знаходзяцца пад вартай па гэтай справе», — сказаў ён.
Паводле яго слоў, у следства ёсць некалькі версій, аднак прадстаўнік пракуратуры адмовіўся іх раскрываць.
«У рамках расследавання мы сабралі ў неабходным аб’ёме шырокія доказы. Гэтыя доказы пастаянна аналізуюцца. Мы збіраем усю даступную інфармацыю, аналізуем лічбавыя матэрыялы, запісы з камер відэаназірання і вывучаем паказанні сведкаў», — сказаў ён.
Адказваючы на ўдакладняльнае пытанне, Козак адзначыў, што паліцыі даводзіцца апрацоўваць вялікія аб’ёмы доказаў, таму могуць быць затрыманыя людзі, якія меркавана маюць дачыненне да справы.
«Першапачатковыя высновы паліцыі ўказвалі на магчымую датычнасць гэтых двух мужчын да дадзенай падзеі і справы. Таму яны былі затрыманыя да суда. Сабраныя доказы былі падвергнутыя вельмі дэталёваму аналізу, і гэты аналіз не пацвердзіў першапачатковых падазрэнняў адносна датычнасці гэтых двух мужчын да забойства. Таму пасля допыту яны былі адпушчаныя», — сказаў ён.
Іншыя асобы ў рамках расследавання пакуль не затрымліваліся.
