У Беларусі хочуць стварыць Акадэмію інтэлектуальных тэхналогій. Гэта будзе навучальная ўстанова для адоранай моладзі, якая будзе спалучаць даследчыя і адукацыйныя функцыі. Аляксандр Лукашэнка агучваў гэтую ідэю і раней, а сёння вынес яе на нараду, як звычайна паставіўшы пад сумнеў стварэнне такой ВНУ.
«Адразу хачу сказаць: другі фундаментальны напрамак у Беларусі не патрэбны. Я не выключаю, што ў гэтым навуковым цэнтры будзе нямала і фундаментальных навук або іх элементаў. Але гэта павінен быць прыкладны напрамак. Перш за ўсё для жыцця. Хай нават на пэўную перспектыву. Пажадана не на далёкую перспектыву. Стварыць трэба тое, што будзе патрэбна заўтра і паслязаўтра», — сказаў ён, перадае яго прэс-служба.
На думку Лукашэнкі, прадстаўнікі беларускай фундаментальнай навукі шмат абяцаюць, але прарыўных ідэй не генеруюць.
«Яны ўсё вывучаюць, вывучаюць, кажуць, што без фундаментальнай навукі ніякіх прыкладных навук не можа быць і гэтак далей. Фундаментальнай навукі няма, а прыкладныя ў нас хоць нешта робяць, але робяць мала», — працягнуў ён.
Ён дадаў, што патрабуецца апераджальнае развіццё сістэмы вышэйшай адукацыі.
«Зрабіўшы стаўку на ўкараненне найноўшых адукацыйных тэхналогій у працы з таленавітымі дзецьмі, мы пачалі фарміраваць будучыню нашай краіны, інтэлектуальную эліту.
Але час не стаіць на месцы, і нам неабходна зрабіць якасны рывок у працы з адоранай моладдзю і не толькі моладдзю.
Я ўжо неаднаразова казаў, што фарміраванне эканомікі будучыні немагчымае без апераджальнага развіцця сістэмы вышэйшай адукацыі», — сказаў ён.
Паводле яго слоў, гаворка ідзе пра стварэнне прынцыпова новага адукацыйнага асяроддзя — гнуткага, міждысцыплінарнага, арыентаванага на вынік і інтэграванага ў рэальныя эканамічныя працэсы пад патрэбы нашай краіны. Менавіта таму наспела неабходнасць у стварэнні новага ўніверсітэта — універсітэта будучыні.
Лукашэнка лічыць, што новая ўстанова можа быць адкрытая для людзей усіх узростаў.
«Маладыя, юныя, зусім дарослыя або пенсіянеры — гэта мы павінны вызначыцца. Неважна, які ўзрост у чалавека. Галоўнае, каб у яго ў галаве нешта было. Гэта маё меркаванне, хачу пачуць ваша», — сказаў ён.
Разам з тым акадэмія не павінна стаць проста пастаўшчыком дыпломаў.
«Нельга дапусціць, каб гэты цэнтр, Акадэмія або ўніверсітэт, стаў звычайнай ВНУ і проста пастаўшчыком дыпломаў. Тут павінны рыхтаваць спецыялістаў, здольных ствараць уласныя рашэнні ў найбольш перспектыўных галінах. Як цяпер модна казаць, у штучным інтэлекце, новых матэрыялах, лічбавай прамысловасці, квантавых тэхналогіях.
Абавязкова не тое, што мы можам (ды мы ўсё зможам), а ці трэба нам гэта — вось пытанне. Ці варта нам сёння марнаваць на гэта грошы? Вось гэта галоўнае.
Акрамя адукацыйнага кірунку Акадэмія павінна стаць адным з ключавых інструментаў забеспячэння тэхналагічнага суверэнітэту. Генеруючы новыя тэхналогіі і інжынерныя рашэнні, працаваць на павышэнне прадукцыйнасці прадпрыемстваў, рост экспарту і канкурэнтаздольнасці краіны. Спадзяюся, вы гэта разумееце», — сказаў Лукашэнка.
