Дзярждэпартамент ЗША абвясціў пра ўвядзенне санкцый супраць 11 арганізацый і трох фізічных асоб, якія, на думку амерыканскага боку, дапамагаюць Ірану набываць зброю або выкарыстоўваць яе.
У санкцыйны спіс трапілі юрыдычныя і фізічныя асобы з Ірана, Кітая, ААЭ і Беларусі.
«У сённяшні спіс уваходзяць некалькі арганізацый, якія базуюцца ў Кітаі і прадастаўляюць спадарожнікавыя здымкі для забеспячэння ваенных удараў Ірана па амерыканскіх войсках на Блізкім Усходзе. Акрамя таго, мы ўводзім санкцыі супраць арганізацый і фізічных асоб, якія спрыяюць намаганням іранскіх вайскоўцаў па забеспячэнні сябе зброяй, а таксама сыравінай, якая выкарыстоўваецца ў іранскіх праграмах балістычных ракет і беспілотных лятальных апаратаў», — гаворыцца ў паведамленні Дзярждэпартамента.
Санкцыі датычацца беларускага ТАА «Арморы Альянс», грамадзяніна Ірана Махамадмахдзі Малекі, які пражывае ў Беларусі і працуе ў дадзенай кампаніі, а таксама яе дырэктара — грамадзяніна Беларусі Махамеда Алі Талібава. У прэс-рэлізе Мінфіна ЗША ён названы «даўнім пасярэднікам у закупках узбраенняў для Ірана ў Беларусі».
Беларуская юрыдычная асоба, паводле версіі амерыканскага боку, разам з ганконгскай кампаніяй HK Hesin Industry Co Limited выступала ў якасці пасярэдніка пры закупках для Цэнтра прагрэсу і развіцця Ірана, хаваючы канчатковага спажыўца. У схему таксама былі ўцягнутыя дубайская кампанія Elite Energy FZCO, кітайская Yushita Shanghai International Trade Co Ltd і яшчэ адна ганконгская AE International Trade Co Limited.
Акрамя таго, санкцыйнымі мерамі ахоплены кампаніі, звязаныя з фінансаваннем здзелак, а таксама закупкамі серварухавікоў для іранскіх беспілотнікаў Shahed-136, сыравіны для аэракасмічнай прамысловасці і інш.
