Прэзідэнт Украіны Уладзімір Зяленскі заявіў, што ў цяперашні час існуе рызыка далейшага ўцягвання Беларусі ў вайну супраць Украіны. Пра гэта ён паведаміў на закрытай сустрэчы з журналістамі, піша «Главком».
Ён адзначыў, што Расія выкарыстоўвала тэрыторыю Беларусі для паветраных калідораў і тэхнічнай падтрымкі атак, у прыватнасці запуску дронаў па ўкраінскай энергетыцы. Паводле яго слоў, украінскія службы прымалі меры для зніжэння эфектыўнасці такой інфраструктуры.
Асобную занепакоенасць Кіева выклікае размяшчэнне на тэрыторыі Беларусі новага ўзбраення, якое можа ўжо часткова знаходзіцца ў краіне, адзначыў украінскі лідар. Украіна расцэньвае гэта як сур’ёзную пагрозу і прыкмету падрыхтоўкі да эскалацыі, у сувязі з чым прымае адказныя меры для процідзеяння рызыкам.
«Мы лічым, што існуюць рызыкі ў сувязі з уцягваннем беларусаў у вайну. Увесь гэты час Расія будавала рознага кшталту паветраныя калідоры, якімі карысталіся расіяне падчас атак на нашу энергетыку. Перш за ўсё, гэта ўдарныя дроны. Гэта тэхнічная падтрымка, тэхнічнае абсталяванне на антэнах на тэрыторыі Беларусі, якія дапамагалі дронам. Украіна займалася гэтым пытаннем і знайшла, што зрабіць з некаторымі антэнамі, каб зменшыць маштабы атак супраць нас.
Але мы не можам так бясшумна займацца пытаннем «Арэшніка», як займаліся пытаннем антэн на тэрыторыі Беларусі. І наш сігнал — там ужо цалкам або часткова ёсць «Арэшнік». Там падрыхтоўчыя, тэхнічныя работы зробленыя. Мы гэта выразна разумеем. І ёсць наша прымяненне ракет па Капусціным Яры, дзе расіяне трымаюць адпаведную зброю. Таму такі наш сігнал Беларусі — вас могуць уцягнуць у гэтую вайну, і расіяне гэтага хочуць», — сказаў Зяленскі.
Прэзідэнт Украіны таксама выказаў надзею, што прадстаўнікі дэмакратычных сіл Беларусі, у прыватнасці Святлана Ціханоўская, будуць даносіць да міжнароднай супольнасці інфармацыю пра спробы ўцягнуць іх краіну ў вайну.
«Мы спадзяёмся, што Святлана Ціханоўская і іншыя прадстаўнікі народа Беларусі будуць гаварыць еўрапейцам, гаварыць іншым народам і дзяржавам — а яны часта сустракаюцца — што Беларусь уцягваюць у вайну. Таму што «Арэшнік» — гэта ўжо не антэны. Мы зрабілі ўсё, каб антэны не працавалі, і дакладна зробім усё, каб «Арэшнік» нават не пачаў працаваць. Гэта пагроза нам. І мы хочам задзейнічаць усе інструменты, каб гэтага не адбылося. Калі Расіі ўдасца ўцягнуць у гэтую вайну яшчэ адну краіну цалкам — Беларусь — гэта будзе вялікая трагедыя», — заявіў Зяленскі.
Паводле яго слоў, Украіна перадае беларусам розныя сігналы з просьбай не дазволіць уцягнуць сябе ў баявыя дзеянні, падкрэсліваючы агульнасць еўрапейскіх каштоўнасцяў і бяспекі рэгіёна. У выпадку поўнага ўцягвання Беларусі ў вайну гэта можа стаць вялікай трагедыяй для абодвух народаў.
Зяленскі таксама адзначыў, што пасля першых ракетных удараў з беларускай тэрыторыі Мінск перакладаў адказнасць на Расію. Аднак цяпер, паводле яго слоў, калі гаворка ідзе пра новыя віды ўзбраення і беспілотнікі, растлумачыць іх з’яўленне толькі дзеяннямі расійскіх вайскоўцаў будзе значна складаней.
