За выходныя два дзіцяці атрымалі траўмы пры катанні на цюбінгах

7 і 8 лютага два дзіцяці атрымалі траўмы пры катанні на цюбінгах, паведамляе Следчы камітэт.

7 лютага ў Салігорску 9-гадовы хлопчык, яго 6-гадовы брат, бацька і дзядзька каталіся з горкі. Дзеці вырашылі пракаціцца ўдваіх на цюбінгу, разлічаным на аднаго чалавека. Падчас спуску цюбінг наехаў на яму і падскочыў. Старэйшае дзіця выпала і ўдарылася аб дрэва. Яго шпіталізавалі з траўмамі.

8 лютага ў Жлобінскім раёне бацька ўзяў на горку дзвюх дачок. Дзяўчынкі па чарзе з’язджалі з горкі з бацькам. Падчас аднаго са спускаў мужчына лёг жыватом на т’юбінг, а яго 6-гадовая дачка размясцілася зверху. Калі «ватрушку» павяло ў бок дрэў, бацька спрабаваў выраўнаваць траекторыю, але ўсё ж урэзаўся ў дрэва. Дзяўчынка ўдарылася галавой. Яе шпіталізавалі.