Экс-каліновец Васіль Верамейчык, імаверна, перанёс інфаркт у зняволенні. Яго дадалі ў гуманітарны спіс палітвязняў з сур’ёзнымі праблемамі са здароўем, расказала «Нашай Ніве» жонка Верамейчыка Яўгенія.
Праблемы са здароўем пачаліся ў Верамейчыка яшчэ тады, калі ён знаходзіўся ў СІЗА. Ён скардзіўся на сімптомы, якія ўказвалі на праблемы з сэрцам: боль у грудзях, дыхавіцу, галавакружэнне, ацёкі рук і ног. Медыцынскай дапамогі ў СІЗА ён не атрымаў.
У 2025 годзе Верамейчыка прыгаварылі да 13 гадоў калоніі і этапавалі ў калонію №17 у Шклове. Там яму правялі абследаванне, прызначылі кропельніцы і выпісалі аспікард, клопідагрэл, атарвастацін і метапралол.
Сваякі таксама звяртаюць увагу, што Васіля доўгі час не адпраўлялі ў штрафны ізалятар у калоніі, хоць туды часта трапляюць зняволеныя па менш цяжкіх артыкулах. Адміністрацыя калоніі ўдакладняла, што Верамейчыка не адпраўлялі ў ШІЗА праз праблемы з сэрцам. Сітуацыя змянілася вясной 2026 года: па абмежаваннях у камунікацыі сваякі бачаць, што ён быў у ШІЗА некалькі разоў.
Паводле слоў Яўгеніі, Верамейчыка павінны былі накіраваць у бальніцу пры мінскім СІЗА №1 на пачатку чэрвеня для аперацыі на сэрцы, але замест гэтага яго адправілі ў ШІЗА, а потым у памяшканне камернага тыпу.
Нагадаем, Верамейчыка затрымалі ў В’етнаме і экстрадавалі ў Беларусь у лістападзе 2024 года. Яго прыгаварылі да 13 гадоў калоніі. Верамейчык абвінавачваўся ва ўдзеле ў «экстрэмісцкіх фарміраваннях», удзеле ў ваенным канфлікце без паўнамоцтваў з боку дзяржавы, удзеле ў змове з мэтай захопу дзяржаўнай улады, садзейнічанні «экстрэмісцкай дзейнасці», пагрозах і абразах у адрас сілавікоў, Аляксандра Лукашэнкі, суддзяў.
