Ваенная дэлегацыя М’янмы высокага ўзроўню на чале з генерал-кватэрмайстрам Узброеных сіл генерал-лейтэнантам Зо М’ё Тынам знаходзіцца з візітам у Беларусі.
Дэлегацыя сустрэлася з міністрам абароны Беларусі Віктарам Хрэніным. Бакі абмеркавалі «бягучы стан і перспектывы двухбаковага супрацоўніцтва, уключаючы яго эканамічныя аспекты», – паведамляе прэс-служба Мінабароны.
Хрэнін заявіў, што візіт будзе спрыяць рэалізацыі дарожнай карты супрацоўніцтва з М’янмай на 2026-2028 гады.
«Пазітыўная дынаміка нашага супрацоўніцтва высокага ўзроўню адпавядае нацыянальным інтарэсам нашых дзяржаў, пацвярджае ўзаемны давер паміж узброенымі сіламі М’янмы і Беларусі. Абаронныя ведамствы нашых краін паспяхова знаходзяць пункты судакранання, адкрываючы новыя магчымасці для ўзаемавыгаднага супрацоўніцтва», — адзначыў Зо М’ё Тын. Ён падзякаваў Беларусі за аказаную М’янме дапамогу пасля землятрусу.
Дэлегацыя таксама наведала МАЗ, дзе азнаёмілася з выпускаемай прадукцыяй. Праграмай візіту прадугледжана наведванне шэрагу прадпрыемстваў у Мінску і Віцебску.
