Савет міністраў Беларусі прыняў пастанову, якой удакладняецца парадак правядзення цэнтралізаванага тэсціравання. Як паведамілі ў прэс-службе ўрада, у дакуменце ўлічаны прапановы дзяржаўнай камісіі па кантролі за ходам падрыхтоўкі і правядзення ўступнай кампаніі ў 2025 годзе.
У пастанове прапісаны патрабаванні да пунктаў правядзення ЦТ па стварэнні ўмоў для абітурыентаў з асаблівымі індывідуальнымі патрэбамі. Гаворка ідзе пра магчымасць выкарыстання спецыялізаваных прылад, у тым ліку прылад мабільнай сувязі з праграмным забеспячэннем для кантролю стану здароўя, прадастаўленне абітурыентам з парушэннямі функцый апорна-рухальнага апарату спецыяльных месцаў у аўдыторыі для праходжання ЦТ з улікам іх патрэб. Абітурыенты, якія маюць патрэбу ў асаблівых умовах, павінны будуць пры рэгістрацыі і праходжанні ЦТ прадаставіць медыцынскую даведку аб стане здароўя і ўказаць у заяве неабходныя спецыяльныя ўмовы.
Таксама пастановай удакладнены пералік абмежаванняў для абітурыентаў пры праходжанні ЦТ, у прыватнасці забараняецца выносіць з аўдыторыі і пункта правядзення ЦТ пісьмовыя нататкі і запісы на любым носьбіце. Акрамя таго, канкрэтызаваны патрабаванні да калькулятараў, якія могуць выкарыстоўвацца пры выкананні экзаменацыйных работ па вучэбных прадметах «Хімія», «Фізіка».
