Украіна і Расія правялі чарговы абмен ваеннапалоннымі. Кожны з бакоў перадаў па 300 чалавек, паведамляе Міністэрства абароны РФ.
Пасярэднікамі ў арганізацыі абмену выступілі ААЭ і ЗША. Вернутыя расійскія ваеннаслужачыя ў цяперашні час знаходзяцца ў Беларусі, дзе ім аказваецца медыцынская і псіхалагічная дапамога. Пазней іх даставяць у Расію для лячэння і рэабілітацыі, дадалі ў ведамстве.
Як паведаміў прэзідэнт Украіны Уладзімір Зяленскі, у рамках абмену сёння ўдалося вярнуць двух грамадзянскіх украінцаў.
“Яшчэ 300 украінскіх абаронцаў вяртаюцца дадому з расійскага палону. Таксама сёння ўдалося вярнуць двух грамадзянскіх украінцаў. Сярод іх хлопцы з Узброеных Сіл Украіны, Нацыянальнай гвардыі, нашай памежнай службы. Радавыя, сяржанты, афіцэры. Абаранялі Украіну на розных напрамках: Данецкім, Луганскім, Харкаўскім, Запарожскім, Херсонскім, у Марыупалі. Большасць з іх былі ў палоне больш за год, некаторыя — з 2022 года”, — расказаў украінскі лідар.
