Сёння ноччу ў Люблінскім ваяводстве Польшчы быў выяўлены 10-метровы кратар, які мог утварыцца пасля падзення і выбуху невядомага аб’екта. Варонка знаходзіцца ў полі недалёка ад населенага пункта Тарнава-Калонія, размешчанага прыкладна за 90 км ад мяжы з Украінай.
Месца здарэння ачэплена, там працуюць паліцыя, сапёры і іншыя службы. Выяўленыя абломкі невядомага аб’екта.
Як паведамляе Lublin112, жыхары размешчанага побач Таргавіска ноччу чулі вельмі гучны гук, дрыжалі вокны. Яны параўналі яго з выбухам бомбы.
Сёння Расія здзейсніла чарговы масіраваны налёт на Украіну, нацэліўшыся ў тым ліку на заходнія вобласці краіны. У такіх выпадках Польшча, як правіла, падымае ў паветра знішчальнікі і павышае гатоўнасць СПА. Аднак на гэты раз у значнай частцы паветаў Люблінскага ваяводства былі на кароткі час актываваныя сігналы паветранай трывогі. Праз 10-20 хвілін яна была адменена.
