Міністэрства антыманапольнага рэгулявання і гандлю Беларусі выявіла парушэнні заканадаўства аб цэнах і цэнаўтварэнні ў двух суб’ектаў гаспадарання.
Як паведамілі ў прэс-службе ведамства, у Мінску ТАА «ФартОкАбсолют» пры продажы курыных яек перавысіла ўстаноўленую гандлёвую надбаўку. Замест дазволеных 35% кампанія прымяняла надбаўку ад 56,66% да 62%. У выніку яйкі прадаваліся па цане ад 3,50 да 4,30 рубля пры дапушчальным кошце ад 3,09 да 3,63 рубля.
Эканамічны суд Мінска наклаў штрафы на службовую і юрыдычную асобу кампаніі на агульную суму больш за 15 тысяч рублёў. Пастановы суда пакуль не набылі моц.
Яшчэ адно парушэнне выяўлена ў СФГ «Дубица-агро» з Мінскай вобласці. Пры пастаўках рэгуляваных тавараў (бульбы, морквы, буракоў, капусты, цыбулі і яблыкаў) у адрас бюджэтных арганізацый гаспадарка завышала гранічныя адпускныя цэны і аптовыя надбаўкі.
Акрамя таго, у таварна-транспартных накладных адсутнічалі абавязковыя звесткі пра цану вытворцы, памер скідкі, аптовую надбаўку і ўмовы дастаўкі. Эканамічны суд Мінскай вобласці аштрафаваў службовую і юрыдычную асобу на агульную суму больш за 6,8 тысячы рублёў. Пастановы набылі моц.
Паводле даных МАРГ, за першае паўгоддзе 2026 года падчас кантролю за выкананнем заканадаўства аб цэнах парушэнні былі выяўленыя больш чым у 150 суб’ектаў гаспадарання. Ведамства накіравала 75 прадпісанняў, а меры адміністрацыйнай і прафілактычнай адказнасці прымененыя ў дачыненні да 213 вінаватых асоб. Агульная сума штрафных санкцый па разгледжаных справах склала больш за 128 тысяч рублёў.