Суд у Кіеве не змог пачаць разгляд крымінальнай справы па абвінавачанні беларускай журналісткі Іны Кардаш ў шпіянажы. Пра гэта паведамляе «Радыё Свабода».
Ва ўкраінскай судовай практыцы спачатку суд праводзіць падрыхтоўчае пасяджэнне, на якім даецца ацэнка адпаведнасці абвінаваўчага заключэння ўкраінскаму заканадаўству, а затым прызначаецца пасяджэнне, на якім ужо пачынаюць разглядаць справу па сутнасці.
Як піша «Радыё Свабода», падрыхтоўчае пасяджэнне адбылося, аднак у справе Кардаш шмат матэрыялаў з грыфам сакрэтнасці. Суддзя, які быў прызначаны весці пасяджэнне па лёсаванні, не мае адпаведнага допуску, таму ён звярнуўся да кіраўніцтва з просьбай прызначыць іншага суддзю або некалькіх суддзяў, якія маюць такі допуск.
Адначасова суд падтрымаў хадайніцтва пракуратуры аб падаўжэнні ўтрымання Іны Кардаш пад вартай. Яно падоўжана да 16 жніўня. Адвакатка Кардаш хадайнічала аб яе пераводзе пад хатні арышт.
