Пастаянны прадстаўнік Беларусі ў ААН і адзін з ключавых перамоўнікаў з ЗША Валянцін Рыбакоў, каментуючы вынікі перамоў з амерыканскай дэлегацыяй у Мінску, запэўніў, што Вашынгтон не спрабуе ўплываць на Лукашэнку ў яго ўзаемаадносінах з Расіяй. Пра гэта беларускі чыноўнік расказаў у інтэрв’ю дзяржаўнаму тэлебачанню.
“Вельмі часта мне даводзілася адказваць на пытанне пра тое, ці спрабуюць амерыканцы нейкім чынам паўплываць на нас у нашых узаемаадносінах з Расіяй. Я магу вас у гэтым запэўніць — ніколі. Я ўжо ўдзельнічаў у многіх падобных перамовах, і пра гэта ніколі не ішла гаворка, ні разу не было ніякіх спробаў нейкім чынам нас з Расіяй адно аднаму супрацьпаставіць, пасварыць і гэтак далей, і гэтак далей.
Амерыканцы зыходзяць, цяперашняя адміністрацыя, зыходзяць з таго, што ў нас абсалютна цесныя, цёплыя, сяброўскія, роднасныя, саюзніцкія — якія заўгодна — адносіны з Расійскай Федэрацыяй. І ніякіх спробаў умяшацца ў гэтыя ўзаемаадносіны ніколі не было, і, я думаю, ніколі не будзе”, — растлумачыў ён.
У тым жа інтэрв’ю Рыбакоў намякнуў на бізнес з ЗША, «які мы можам сумесна развіваць».
