Каментуючы беларускаму дзяржаўнаму тэлебачанню вынікі перамоў з амерыканскай дэлегацыяй у Мінску, пастаянны прадстаўнік Беларусі ў ААН і адзін з ключавых перамоўнікаў Валянцін Рыбакоў патлумачыў, што разумеецца пад нармалізацыяй адносін Беларусі і ЗША.
Рыбакоў спаслаўся на словы спецпрадстаўніка прэзідэнта ЗША Джона Коўла і намякнуў на нейкі сумесны бізнес з амерыканскім бокам.
“Спадар Коўл сёння абсалютна выразна даў зразумець. Не проста даў зразумець, а заявіў пра гэта абсалютна адкрыта на сустрэчы з прэзідэнтам Аляксандрам Лукашэнкам. Ён сказаў, што канчатковая мэта, якую ён і адміністрацыя ЗША перад сабой ставяць, — гэта поўная нармалізацыя нашых узаемаадносін.
У гэта паняцце ўваходзіць абсалютна ўсё. Гэта значыць, гэта палітычныя адносіны, гэта эканамічныя адносіны, гэта бізнес, які мы можам сумесна развіваць, якім мы можам сумесна займацца. Гэта культура, гэта ўсё, гэта ўвесь комплекс нашых узаемаадносін. Гэта не павярхоўнае такое выказванне «ўвесь комплекс двухбаковых адносін». Гэта сапраўды ўключае ў сябе абсалютна ўсё”, — распавёў Рыбакоў.
