Прарасійскім актывістам удалося ўбудаваць шэсці «Бессмяротны полк» у акцыю «Беларусь памятае»

Прарасійскім актывістам удалося правесці шэсце «Бессмяротны полк» у абласных беларускіх гарадах, далучыўшы свае калоны да афіцыйных шэсцяў «Беларусь памятае». Пра мерапрыемствы адчыталіся пасольства Расіі ў Беларусі і прадстаўніцтвы «Рассупрацоўніцтва». Беларуская прапаганда акцыю «Бессмяротны полк» не згадвала.

У Гродне аб’яднаную калону ўзначалілі консул-дарадца Генеральнага консульства Расіі Гаўрыіл Мамантаў і кіраўніца «Рускага дома» Юлія Сяменчанка.

«9 мая 2026 года Гродна стаў цэнтрам маштабнага патрыятычнага яднання. У дзень 81-годдзя Вялікай Перамогі аб’яднаная калона акцый „Беларусь памятае“ і „Бессмяротны полк“ сабрала каласальную колькасць удзельнікаў. У калоне „Бессмяротны полк“ суайчыннікі з партрэтамі сваіх дзядоў, бабуль і прадзедаў адзіным строем прайшлі па галоўнай вуліцы Гродна.

Асаблівую душу шэсцю надавалі музычныя імгненні. Проста ў калоне гучаў баян — людзі падхоплівалі знаёмыя кожнаму мелодыі. „Кацяруша“, „Смуглянка“, „Дзень Перамогі“, „У зямлянцы“ — гэтыя песні, праспяваныя хорам тысяч гродзенцаў, разрывалі цішыню над Нёманам. Жывая музыка аб’яднала ўсіх — і тых, хто ішоў з партрэтамі, і тых, хто стаяў на тратуарах», — расказалі ў гродзенскім «Рускім доме».

У Віцебску ў маршы, які адбыўся ў рамках агульнарэспубліканскай акцыі «Беларусь памятае», прынялі ўдзел супрацоўнікі аддзялення пасольства Расіі, паведамілі ў расійскім дыпведамстве.

У Брэсце расійскае Генконсульства таксама адчыталася пра аб’яднаную калону дзвюх акцый.

«У Брэсце ў калону сабраліся ўдзельнікі акцыі „Беларусь памятае. Памятаем кожнага“ і „Бессмяротнага палка“, шматлікія дэлегацыі, госці і жыхары горада», — паведамілі ў расійскім Генконсульстве ў Брэсце.

Сцвярджаецца, што «9 мая тысячы жыхароў і гасцей Брэста далучыліся да святочнага шэсця „Бессмяротнага палка“ і акцыі „Беларусь памятае“, каб разам адзначыць Дзень Перамогі».

Як заявілі ў пасольстве Расіі ў Беларусі, на акцыю ў Магілёве прыйшлі «не толькі жыхары горада, але і госці, якія прыбылі з расійскай сталіцы».

«Бессмяротны полк» таксама прайшоў па вуліцах Гомеля. У шэсці прынялі ўдзел супрацоўнікі аддзялення пасольства Расіі і Рускага Дома ў Гомелі на чале з кіраўніком Аляксандрам Маржухіным.

«У гэтым адзіным патоку пад гукі вайсковых маршаў і рытмічны крок „Бессмяротнага палка“ адчуваеш неверагодную сілу: мы — спадчыннікі Перамогі, і мы памятаем», — заявілі ў гомельскім «Рускім доме».

Sputnik Беларусь апублікаваў відэа з Мінска з каментарыем «Удзельнікі акцый „Бессмяротны полк“ дзеляцца ўспамінамі пра сваіх сваякоў, якія ўдзельнічалі ў Вялікай Айчыннай вайне». На кадрах фігуруюць двое дзяцей, якія ўскладаюць кветкі да помніка Марату Казею, і трое дарослых з партрэтамі сваякоў і Іосіфа Сталіна.

Раней прарасійскі актывіст Андрэй Герашчанка звяртаўся да беларускіх уладаў з просьбай дазволіць правесці шэсце «Бессмяротны полк» у беларускіх гарадах.

«Лічым, што шэсце „Бессмяротны полк“ павінна быць элементам агульнадзяржаўнай акцыі „Беларусь памятае“. Уключэнне асобных каробак „Бессмяротнага палка“ ў склад калон „Беларусь памятае“ пацвярджае адзінства Расіі і Беларусі, расіян і беларусаў у пытанні святкавання Дня Перамогі. Вопыт такога ўзаемадзеяння добра сябе зарэкамендаваў па выніках арганізацыі святочных мерапрыемстваў 9 мая ў 2024 і 2025 гадах», — заяўляў ён.

Днямі паведамлялася, што Мінгарвыканкам адмовіў арганізатарам у правядзенні шэсця «Бессмяротнага палка» ў Мінску 9 мая.