Польшча працуе над падаўжэннем дзеяння польскага праязнога дакумента для іншаземцаў да трох гадоў. Пра гэта заявіў кіраўнік Упраўлення па справах іншаземцаў Польшчы на сустрэчы з прадстаўнікамі беларускіх дэмсіл 23 сакавіка. У сустрэчы прымалі ўдзел намеснік кіраўніка АПК Павел Латушка, кіраўніца аддзела прававой дапамогі Цэнтра беларускай салідарнасці Вольга Дабравольская і дарадца па прававых пытаннях НАУ Міхаіл Кірылюк.
«Кіраўнік паведаміў, што ўсё яшчэ вядзецца праца над падаўжэннем тэрміну дзеяння польскага праязнога дакумента — плануецца павялічыць яго да 3 гадоў. Канкрэтныя тэрміны пакуль не вядомыя, аднак сам факт далейшага руху ў гэтым кірунку — ужо добры сігнал», — напісала Дабравольская па выніках сустрэчы.
Прадстаўнік Упраўлення па справах іншаземцаў таксама растлумачыў, у якіх выпадках іншаземцы, што падалі заяву на міжнародную абарону, маюць права працаваць і ці могуць выязджаць з Польшчы.
Выезды падчас працэдуры міжнароднай абароны магчымыя, калі ў іншаземца ёсць дзейны від на жыхарства і праязны дакумент (пашпарт або польскі праязны дакумент). У такіх выпадках кароткатэрміновыя выезды не павінны станавіцца прычынай закрыцця справы па міжнароднай абароне.
Працаваць падчас чакання рашэння па міжнароднай абароне можна, калі справа іншаземца разглядаецца больш за шэсць месяцаў. У гэтым выпадку іншаземец мае права падаць заяву на атрыманне дазволу на працу. Гэта таксама датычыцца людзей, у дачыненні да якіх вынесена рашэнне аб перадачы па Дублінскім рэгламенце, але яно было абскарджана, і тых, у каго адміністрацыйны суд адмяніў рашэнні абедзвюх інстанцый.
«Важна: усё вышэйапісанае — гэта вусная інтэрпрэтацыя. Яна не з’яўляецца крыніцай права і не мае абавязковай юрыдычнай сілы. Таму да гэтай інфармацыі варта ставіцца з асцярогай, і ў кожным канкрэтным выпадку лепш пракансультавацца з юрыстам», — звяртае ўвагу Дабравольская.
