Пацярпелых у Бранскай вобласці РФ беларускіх грамадзян даставяць у Беларусь для аказання медыцынскай дапамогі. Пра гэта паведаміў міністр аховы здароўя Аляксандр Хаджаеў, перадае БелТА.
Паводле яго слоў, адзін дарослы і адно дзіця знаходзяцца ў цяжкім стане. Расійскі бок прапанаваў аказаць дапамогу ў медыцынскіх установах Расіі, аднак Аляксандр Лукашэнка даў даручэнне даставіць грамадзян у Беларусь. У цяперашні час рыхтуецца медыцынскі верталёт для іх транспартавання.
“Нашы калегі дабраліся да пацярпелых. Таксама туды прыехалі калегі з Масквы. У дадзены момант праведзена ацэнка стану нашых пацыентаў. Два цяжкія пацыенты: адзін дарослы і адно дзіця”, — сказаў ён.
Раней з Мінска ў Бранск былі накіраваны спецыялісты рэспубліканскага ўзроўню: анестэзіёлагі-рэаніматолагі, дзіцячыя хірургі і спецыялісты Рэспубліканскага цэнтра агнястрэльнай траўмы.
Выконваючы абавязкі губернатара Бранскай вобласці Ягор Кавальчук размясціў у сваім тэлеграм-канале фота са шпіталя. На здымках, як сцвярджаецца, — пацярпелыя пры атацы на аўтобус.
“Беларускія спецыялісты ўжо прыбылі ў Почап, дзе знаходзяцца астатнія пасажыры аўтобуса, якія не пацярпелі, 36 чалавек. У пункце часовага размяшчэння, які быў аператыўна разгорнуты, для іх створаны ўсе ўмовы, працуюць псіхолагі”, — напісаў ён.
Нагадаем, раней паведамлялася, што аўтобус з 28 дзецьмі з дзіцячай футбольнай каманды ДЮСШ №2 Рэчыцы трапіў пад удар беспілотніка ў Бранскай вобласці 17 чэрвеня. Следчы камітэт РФ заявіў, што дрон быў украінскім. У выніку ўдару загінула жонка трэнера ДЮСШ, якая суправаджала каманду. Восем чалавек, у тым ліку шэсць дзяцей, пацярпелі.
Украінскі бок адхіляе гэтыя абвінавачванні і называе тое, што адбылося, інфармацыйнай правакацыяй.
