Жыхарка індыйскага штата Гуджарат сцвярджае, што стала ахвярай махлярства. Паводле яе слоў, яна прыехала ў Беларусь на працу, але працы так і не атрымала і цяпер не можа вярнуцца дадому, бо ў яе няма грошай.
Сваю гісторыю жанчына па імені Міна Джошы распавяла гуджарацкаму выданню Divya Bhaskar, піша Bhaskar English.
Джошы, удава з трыма дзецьмі, кажа, што агент паабяцаў у Беларусі працу па ўпакоўцы садавіны з заробкам 70–80 тысяч рупій у месяц (770–870 долараў). Каб заплаціць агенту і прыехаць у Беларусь, яна ўзяла ў доўг каля 6 тысяч долараў.
Паводле слоў жанчыны, у Беларусі яна не атрымала абяцанай працы і заробку. Яна сцвярджае, што яе пасялілі ў кароўніку за 350–400 км ад Мінска. На відэа жанчына кажа, што ледзь выжывае і хоча вярнуцца ў Індыю, але ў яе няма грошай.
