Следчы камітэт расследуе крымінальную справу аб махлярстве ў дачыненні да 19-гадовага навучэнца каледжа з Магілёўскай вобласці. Паводле версіі следства, амаль год малады чалавек прадаваў неіснуючыя білеты.
“З красавіка 2025 года па студзень 2026 года малады чалавек адсочваў аб’явы на папулярнай гандлёвай інтэрнэт-пляцоўцы. У поле яго зроку траплялі тыя, хто хацеў набыць білеты на рэзанансныя падзеі: хакейныя матчы, канцэрты зорак, тэатральныя прэм’еры і цыркавыя шоу”, – расказалі ў СК.
Затым ён звязваўся з аўтарамі аб’яў, прадстаўляючыся перакупшчыкам або проста ўладальнікам лішняга білета. Перамовы з пакупнікамі хлопец вёў у мэсенджарах. Атрымаўшы перадаплату, ён проста знікаў.
Следству вядома пра 70 пацярпелых, сума шкоды складае каля 10 тыс. рублёў.
Выручаныя грошы малады чалавек траціў на данаты ў анлайн-гульнях. Таксама ён выкарыстоўваў для вываду сродкаў сваіх знаёмых, дзеянням якіх яшчэ будзе дадзена прававая ацэнка.
Малады чалавек заключаны пад варту. СК мяркуе, што пацярпелых можа быць больш. Падманутым пры продажы білетаў прапануюць звярнуцца ў Магілёўскі міжраённы аддзел СК.