Аляксандр Лукашэнка прарэкламаваў Кім Чэн Ыну беларускае стралковае ўзбраенне. Адзін з узораў быў уручаны паўночнакарэйскаму лідару ў якасці падарунка.
Прэс-служба Лукашэнкі апублікавала відэа абмену падарункамі з Кім Чэн Ынам.
Кім Чэн Ын падарыў Лукашэнку халодную зброю, посуд з яго партрэтам, выкананы з ракавін розных малюскаў, і залаты медаль.
Падарункі Лукашэнкі былі больш шматлікімі.
“Не ваявалі цяпер нашы людзі, але стралковае ўзбраенне заўсёды будзе патрэбна для салдата. Вось мы пачалі вырабляць стралковае ўзбраенне”, – сказаў Лукашэнка, паказваючы Кім Чэн Ыну аўтаматычную зброю без устаўленага магазіна.
Той узяў у рукі аўтамат, прымерыўся, як ён ляжыць у руцэ, і адразу ж перадзёрнуў затвор.
“Усё правільна. Зброяй валодае Кім Чэн Ын”, – пракаментаваў Лукашэнка.
“На ўсялякі выпадак, калі ворагі з’явяцца”, – дадаў ён.
Затым настала чарга іншых падарункаў. Кім Чэн Ыну быў паднесены слуцкі пояс. Дачцэ Кім Чэн Ына была перададзена скарбонка, а жонцы – залаты букет з васількоў.
Лукашэнка таксама паднёс паўночнакарэйскаму лідару алкагольныя напоі.
“Гэта тое, што любілі генеральныя сакратары ў Савецкім Саюзе. Калі на паляванне ў Белавежскую пушчу ездзілі, яны выпівалі вось гэтыя напоі “Зуброўка” і “Белавежская”. Гэта настойка на травах. І “Беларускі бальзам”. Гэта можна з гарбатай, можна з гарэлкай”, – сказаў Лукашэнка.
Кім Чэн Ын пацікавіўся крэпасцю напояў.
“А гэта вам сяляне нашы перадаюць, уласнай вытворчасці”, – працягнуў Лукашэнка, прадстаўляючы яшчэ адзін напой.
“Гэта сучасныя падарункавыя варыянты. Яно не прадаецца ў крамах, але самая лепшая ў свеце гарэлка. Генеральны сакратар ААН толькі гэтую гарэлку п’е”, – адрэкамендаваў Лукашэнка яшчэ адзін напой.
Далей настала чарга шакаладу, які таксама не прадаецца ў крамах, а часам вырабляецца на фабрыцы для падарункаў. Ён без кансервантаў, таму трэба спажыць яго за два тыдні.
Акрамя таго, Кім Чэн Ыну прывезлі паспрабаваць зефір, іншыя прадукты харчавання, у тым ліку малочныя.
“А яшчэ ж малочную прадукцыю перададзім у халадзільнікі, малочная прадукцыя наша, каб вы паглядзелі, што мы ўмеем рабіць з малака. Гэта таму, што калісьці вашы людзі хацелі да нас прыехаць і паглядзець, як мы гатуем малочную прадукцыю. Няхай прыязджаюць, мы навучым іх гэта рабіць”, – паабяцаў Лукашэнка.
Таксама былі паднесены вырабы з лёну.
