Беларускія дэмсілы дамовіліся з МЗС Іспаніі аб далейшых кроках па падтрымцы беларусаў, якія пражываюць у краіне. Пра гэта заявіў дыпламатычны дарадца Святланы Ціханоўскай Дзяніс Кучынскі па выніках візіту ў Мадрыд. Ён сустракаўся з дзяржаўным сакратаром МЗС Іспаніі Дыега Марцінесам Белія.
«Я адмыслова прыляцеў у Мадрыд, каб правесці сустрэчу на высокім узроўні з першым намеснікам Міністра замежных справаў Іспаніі. Нашая размова доўжылася амаль тры гадзіны — і гэта паказвае, наколькі сур’ёзна іспанскі бок ставіцца да супрацоўніцтва з беларускімі дэмсіламі, а таксама да праблемаў беларусаў. Мы дамовіліся пра канкрэтныя наступныя крокі па магчымасцях падтрымкі беларусаў, якія жывуць у Іспаніі. Дыега Марцінес запэўніў, што Міністэрства замежных справаў і надалей будзе дапамагаць у прасоўванні і вырашэнні гэтых пытанняў разам з іншымі дзяржаўнымі органамі», — расказаў Кучынскі.
Падчас сустрэчы таксама былі вызначаныя ключавыя кірункі супрацоўніцтва з дэмсіламі, абмяркоўваліся міжнародныя і гуманітарныя пытанні, сітуацыя з палітычнымі зняволенымі, санкцыйная палітыка ЕС і Іспаніі.
Асобнай тэмай сустрэчы стала адкрыццё Місіі дэмакратычных сіл Беларусі ў Мадрыдзе, якая можа стаць важным цэнтрам каардынацыі дзейнасці беларускага прадстаўніцтва і падтрымкі беларусаў у Іспаніі.
Дзяніс Кучынскі перадаў дзяржаўнаму сакратару дакумент, які апісвае існуючыя праблемы і магчымыя шляхі іх вырашэння, падрыхтаваны на аснове прапаноў беларусаў у Іспаніі. У дакуменце асаблівая ўвага надаецца пытанням прызнання пратэрмінаваных беларускіх пашпартоў для тых, хто не можа вярнуцца ў Беларусь для іх падаўжэння, а таксама распрацоўцы нацыянальных рэкамендацый для іспанскіх уладаў пры разглядзе працэдур легалізацыі.
Акрамя таго, Дзяніс Кучынскі і будучая кіраўніца місіі дэмсіл у Іспаніі Таццяна Марыніч сустрэліся з дэпутатамі іспанскага парламента, каб абмеркаваць магчымыя шляхі далейшага супрацоўніцтва і падтрымкі беларускай супольнасці.
Акрамя падтрымкі беларускай дыяспары ў Іспаніі, адным з кірункаў будучай працы місіі стане гуманітарная дапамога ў рэабілітацыі былых беларускіх палітычных зняволеных паблізу Алікантэ сумесна з арганізацыямі Imagoura, Country for Life Foundation, Міжнародным гуманітарным фондам і іншымі. Іспанія ўжо выдаткавала 50 тысяч еўра на Міжнародны гуманітарны фонд. На сустрэчы ў МЗС Дзяніс Кучынскі, сярод іншага, гаварыў пра працяг гэтай падтрымкі.
