ЗША былі расчараваныя адмовай Аляксандра Лукашэнкі прыехаць на першае пасяджэнне Савета міру ў Вашынгтоне. Пра гэта пасля сустрэчы з Лукашэнкам у Мінску заявіў спецпасланнік прэзідэнта ЗША па Беларусі Джон Коўл.
Паводле слоў Коўла, Лукашэнка запрошаны на іншыя пасяджэнні савета.
«Некаторы час таму мы былі расчараваныя тым, што прэзідэнт Лукашэнка не змог прыехаць на пасяджэнне Савета міру, якое нядаўна адбылося ў Вашынгтоне. Але прэзідэнт Трамп запрасіў прэзідэнта Лукашэнку паўдзельнічаць у любых іншых пасяджэннях Савета міру. Мы абмеркавалі гэтае пытанне. Прэзідэнт Лукашэнка пацвердзіў, што ён прыме ўдзел у адным з пасяджэнняў Савета міру», — цытуе Коўла БелТА.
На перамовах з Коўлам у Мінску сёння таксама абмяркоўваўся магчымы візіт Лукашэнкі ў ЗША.
Нагадаем, першае пасяджэнне Савета міру адбылося ў Вашынгтоне 19 лютага. Амерыканскі бок запрасіў Лукашэнку на сустрэчу, але ён не паехаў, спаслаўшыся на шчыльны графік і лагістычныя складанасці. Лукашэнка заяўляў, што абавязкова будзе ўдзельнічаць у працы Савета міру, асабліва калі ён будзе займацца пытаннем Украіны.
Замест яго на сустрэчы павінен быў прысутнічаць міністр замежных спраў Максім Рыжанкоў, аднак яго там таксама не было. У МЗС растлумачылі гэта тым, што міністр не атрымаў амерыканскую візу.
