Латвія аднавіла рух праз пункт пропуску «Патэрніекі» («Грыгароўшчына») на беларуска-латвійскай мяжы.
«Паведамляем, што тэхнічныя няспраўнасці ў працы інфармацыйных сістэм пункта памежнага кантролю „Патэрніекі“ ліквідаваныя. Правядзенне памежнага кантролю цалкам адноўлена», — паведамляе памежная служба Латвіі.
З 5 жніўня будзе адноўлена браніраванне часу для перасячэння мяжы на сайце lvrobeza.lv.
Дзяржаўны памежны камітэт Беларусі пацвярджае, што рух праз пункт пропуску быў адноўлены з 21:00.
«Латвійскі бок паведаміў беларускім памежнікам, што з 21:00 у пункце пропуску „Патэрніекі“ („Грыгароўшчына“) ён аднавіў у поўным аб’ёме пропуск грузавых і легкавых транспартных сродкаў», — паведамляе ДПК.
Нагадаем, адзіны дзейны пункт пропуску «Патэрніекі» на латвійска-беларускай мяжы прыпыніў працу ўвечары 31 ліпеня. Латвійскі бок патлумачыў гэта «тэхнічным збоем». МЗС Беларусі прыгразіла Латвіі адказнымі дзеяннямі несіметрычнага характару. Сёння ўрад Латвіі прыняў рашэнне пакуль не закрываць мяжу з Беларуссю.
